Shillong, Iaiong 30; Ka All Jaiñtia Mid Day Meal Workers Union, Jowai, Ka pynpaw ïa ka jingsngewng
uh shi kat dei eh ïa u Ma Lahkmen Rymbui, u Myntri bad ïa u Bah D. P Wahlang Principal Secretary ka tnat pule ka sorkar jylla kiba la shimkhia haduh ban da ïoh lad syndon ban ïa kren bad u Dr Ramesh Pokriyal Nishank u Myntri ka tnat pule ka sorkar pdeng myn ha ka 29th Iaiong 2020 katkum ba ki ïohi lyngba ki lad pathai khubor.
Kane ka jingïa kren u Myntri ka jylla bad u Myntri ka sorkar pdeng ka la pynïoh mynsien shibun bha ïa baroh ki nongshet ja sngi ïa ki khynnah skul lyngba ka mid day meal scheme ka sorkar pdeng, khamtam eh kum ha kane ka por ba ngim ïoh shuh ban leit trei bad ba ki marbam ha ïew ha hat ki la kiewdor sha ba palat u pud ïa ngi kiba ïoh tang shiphew hajar tyngka shi snem bad ïa ka pisa ngin ïoh pat hadien palat ïa ka lai bnai ba ngi la dep treikam.
Kum ka seng kala sngew dei ban ai ka jingïaroh ruh ïa u Narendra Modi ji u Myntri Rangbah duh ka ri India bad ha ryngkat kiwei ki Myntri ka sorkar pdeng, namar uba da lah shisha ban tehlakam ïa ka rukom synshar ban koit ban khlain ka Ri ban ïaleh ban pynduh ïa ka khniang jingpang corona, kumba la paw na ka jingmynjur ki paidbah ka ri ban shong khop ha la ïing bad ban ngeit ïa ki hukum ka sorkar pdeng.
Kum ka seng ka duwai ba u Narendra Modi ji u Myntri Rangbah duh ka Ri India, ba un dang ïohbor ïoh mynsiem na ka bynta ba un dang lah shuh shuh ban synshar bha ïa ka ri ka jong ngi haduh ba ngin lah ban pynduh thiaw ïa kata ka khlam Corona na kane ka pyrthei.
Ha kum kane ka por ba jynjar bad ba kordit shisha ka jingim kiba duna bha ka jingsiew, hateng hateng ngim sngewthuh kumno ki lah ban pynkdang ïa u kpoh ba thngan ki khun ki jong ki.
Ka seng ka khmihlynti ba ha ka nongrim ka jingïa sngew para briew ha kum kane ka por ba kordit ka jingim ka jong ki tang namar ba ki dei kiba siew na ka sorkar, kan dei ka jingkyrkhu bah bad yn shngain ka jingim ka jong ki lada u Narendra Modi ji u Myntri Rangbah duh un leh isynei ïa ki nongshet ja sngi ïa ki khynnah skul.
Ka seng ka kyrapd ban sngewbha ban pynkiew noh ïa ka jingsiew ïa ki nongshet ja sha ka san hajar tam shi bnai bad kila kyrpad jur ban siew ruh khad ar bnai ha ka shisnem khnang ba kin ïoh ban siew bai skul ïa ki khun ha u snem thymmai bad ban pynïoh ruh ïa kiwei ki jingiarap ha ka koit ka khiah, ka jingshngain ka jingim bad ki shuti haba ioh khyllung bad ka jingsiew haba pang ba shitom.
Kum ki nongtrei ki ruh kim ju pep ban pynbiang ïa ka bam katkum ki kyndon ka sorkar pdeng bad ki khynnah ba ki ai bam ki dei ki khun ki jong ki shabar la ka ïing, hateng hateng ngi kum klet ïa la ki khun lajong, namar ngi sngewthuh ruh ba ngi dei ban shakri hok ïa la ka kamram namar ba kin tei ïa ka lawei ki khynnah skul bad khamtam ia ka Ri India bad ka jylla ka jong ngi.
Mynta, ki don ka jingkyrmen ba ka sorkar India kan pyntreikam noh ia ka jingkyrpad rit ka jong ki. Lyngba ka jingsngap noh u Myntri Rangbah duh ka Ri, ïa ka sur u Conrad K Sangma u Myntri Rangbah, u Lahkmen Rymbui u Myntri ka tnat pule ka jylla Meghalaya.
U Myntri Rangbah bad ka kynhun Myntri ha ka sorkar jylla ki don shisha kata ka mynsiem ban ïarap para briew khamtam ïa kiba bylla sngi bad kiba duna ka ïoh ka kot, kiba duk ba kyrduh, khamtam ha kum kane ka por ka jingpang khlam kaba la ktah ïa baroh ka pyrthei, la ong ka kong N Toi general secretary ka All Jaiñtia Mid Day Meal Workers Union, Jowai
