Shillong, Nohprah 06: Ka jingjied ia ki MDC na ki hynniew tylli ki konstitwensi ha kane ka election MDC shiteng samoi kan long ha ka 13 tarik mynta u bnai bad na ka liang jong ka UDP ka kyrpad ia ki paidbah jong kito ki jaka ba kin sngewbha ban jied ia ki kyrtong jong ka UDP.
U President jong ka UDP u Dr Donkupar Roy u la ong ba, ka seng UDP kaba ai ka jingkyrshan ia u Bah PN Syiem ha KHADC kan dang iai beteng ban ai ka jingkyrshan ia u, bad la da ki paidbah kin pynjop ia ki kyrtongjong ka UDP kan dang pynskhem shuh shuh ia ka EC hapoh KHADC.
Ka jingkyrpad jong ka UDP ia ki paidbah jong ki hynniew tylli ki konstitwensi ban pynjop ia ki kyrtong jong ka UDP ka long ba ka UDP ka kwah ba ka EC kaba la ialam da u bah PN Syiem hapoh jong ka KHADC kan neh haduh ban da kut kane ka iing dorbar kaba mynta.
U Dr Donkupar Roy u la kren shai ba ka UDP kam kwah ban ia knieh ia ka shuki CEM hapoh jong ka KHADC, hynrei ka kwah ban pynkhlain ia ka EC, kaba la kyrshan lang da ka BJP, ka KHNAM bad ki dkhot shimet ban kham pynskhem shuh shuh ia ka EC jong u Bah Pynshngian ka UDP ka kyntu ia ki paidbah ai ka jingjop ia ki kyrtong ka UDP.
