New Delhi, Jymmang 15: La ai ia ki citizenship certificate ba nyngkonghadien ka jingpynbna ia ki kyndon Citizenship (Amendment) Rules, 2024 mynta ka sngi. U Secretary ka Tnat Kam Pohiing jong ka Sorkar Pdeng, Ajay Kumar Bhalla u la ai kine ki citizenship certificate sha katto katne ngut ki briew kiba la pan ia kine ha New Delhi mynta ka sngi.
U Secretary u la kitbokkitrwiang ia kito kiba la ioh ia kine ki certificate bad u la batai shaphang ki mat ba kongsan jong ki kyndon Citizenship (Amendment) Rules, 2024. U Secretary Posts, Director (IB), Registrar General of India bad kiwei kiwei ki ophisar ki la iadonlang ha kane ka sngi.
Ka Sorkar India ka la pynbnaia ki kyndon Citizenship (Amendment) Rules, 2024 ha ka 11 tarik u Lber 2024. Kine ki kyndon ki batai shaphang ka jinglong jong ka application form, ka rukom ban peit ia ki jingpan da ka District Level Committee (DLC) bad ka jingpeit bad jingai ia ka jinglong nongshong shnong ne citizenship da ka State Level Empowered Committee (EC).
Katkum kine ki kyndon, la ioh pdiang ia ki jingpan na ki jaitbynriew Hindu, Sikh, Jain, Buddhist, Parsi bad Christian na Pakistan, Bangladesh bad Afghanistan kiba la rung sha India haduh ka 31.12.2014 namar ka jingshah thombor namar ka niam lane ka jingtieng ia kum kane ka jingshah thombor.
Ki District Level Committee (DLC) ba la khlieh duh da ki Senior Superintendent of Post bad Superintendent of Post kum ki ophisar, haba ki la pynshisha ia ki kot ki sla, ki la ialam ia ki nongpan ha ka jingbamsmai.
Hadien ka jinjgpeitia ka kam katkum ki kyndon, ki DLC ki phah ia ki application sha ka State Level Empowered Committee ba khlieh da u Director (Census operation). Ka jingpeit ia baroh ka kam ha ka rynsan online.
Ka Empowered Committee, Delhi ba la khlieh da u Director (Census Operation), Delhi, hadien ka jingpeit bniah ka la rai ban ai jinglong nongshong shnong ia 14 ngut kiba la pan ia kane. Kumta u Director (Census operation) u la ai iakine ki certificate sha kine ki briew.
