Jowai,Lber 24: Ka Seng Samla Pule na Ri Jaintia Ka Jaintia Student Movement lyngba ka jingtrei shitom jong ka ban bud dien ia u wei u nong pyniap briew, ha ka jingialam jong u Officer jong ka Ladrymbai Police Outpost Ma Wanris Rymbai , Ka Kong Manner Magistrate , Ka doctor Passah bad U Doctor Kyndiat ha ryngkat lang bad ki nong ialam jong ka seng Jaintia Student Movement ha ka jingialam jong u General Secretary Samla Leningstar Rymbai bad U Education Secretary Samla Roitre Dkhar , lem bad kiba ha ing ha sem, la ioh ban sei ia ka met iap jong ka (L) Daphishisha Kharsati na ka shnong Mawryngkneng Pomlahier, kaba u Kheinlang Dkhar u la pyniap dusmon bad tep iaka ha kawei ka thliew side cutting kaba don ha ka shnong Jalyiah Umthoni.Ia kane ka jingjia kala jia na duh u shitarik jong u bnai kyllalyngkot ba la lah 1-01-2014.
Kum ka jingpynkynmaw Ka JSM-CB ka ioh jingtip malu mala ia kane ka jingjia, ka seng khlem da leh sting ka la bud dien ban wat ia ki sakhi satar ba biang ba U tei U nongpyniap briew u ba kyrteng u kheinlang Dkhar ba shong ha Ladrymbai Datsimpein la la leh shisha ia kane ka kam bym man jong u pyrshah ia katei ka khynnah na Mawryngkneng.Ka seng kam lah ban ioh jingtip sa tang ia ka met iap don hi ba u bret bad tep hangno, ha dein ba ka seng ka la dep leh ia kaba don kam , ka la pyntip sha ki pulit jong ka Lad rymbai Police Outpost ban pan Custody biang ia u na ka bynta ban ioh ban toh kit ia u , na mar u la don lypa ha District Jail Jwai na ka bynta ka wei pat ka jingjia ( case ) kaba u la thmu ban pyniap ia ka wei pat ka briew kaba kyrteng Daplin Kyndait na ka shnong Iongkalooh, te ha kane ka sngi ba sei ia ka met iap jong ka (L) Daphishisha Kharsati ruh ka longing longsem ka Daplin Kyndait ha ryngkat u Rangbah shnong Iongkalooh Ma Emmon Dkhar ki la leit sngewlem bad sakhi lang ia kane ka jingsei ia ka met iap jongka.
Ka Daplin ka la donbok shisha namar ha ka jingpeit kum ki briew ngim tharai shuh ba ka dang im, namar u ne u Kheinlang u la dung bad tied ia ka ha baroh shiryngieng jong ka met jong ka da ka tari bad maw.Wat u ruh u tharai ka la iap hi, hynrei don bok don kawei ka briew na ki para jan ing jong katei ka nongshah dung ka la iohi ia u ba u leh ia kane ka kam pap kam sang kumta u la phet bad pyndem ia lade ha ki pulit jong ka ladrymbai Police Outpost.
Ngi ka seng JSM ngim lah khlem da pynpaw ka jingsngewnguh ia ki bor pulit bad bor district ba ki iatrei lang bad ngi ha ka jingiadei bad kane ka jingjia khamtam mynta ba laioh ban sei ia ka met iap jongka na ka bynta kiba haing haseng jong ka kin ioh ban lehniam ba khadduh ia ka ba pli.
Shuh shuh ka JSM ka pyn paw ba kam ym shem teng ban sei madan ia kino kino ki nongleh kam sniew , bad ngi ym kynran dien la da ka long ha kano kano ka dur ruh namar ngi trei ban pynioh ia ka hok jong ka para jaitbynriew jongngi.Ia dein jat ki longshwa ngin bud , ia u ingkhongshalyngmat ngin rat diengkhong.U briew u don ka hok ban im ha ka pyrthei, ka ain hi kan tehlakam ia u ym da u briew.
Ngi kyntu ia ki bor jong ka Ain ba ki dei ban shimkhia ba ym dei ban ai jamin ia kum u ne u briew, namar ka jingleh jong u kam dei ka jingjia aksident hynrei ka long beit ka jingpyniap dusmon ia ka Daphishisha Kharsati bad bad la ap thap khnang ban ia ka Daplin Kyndait , bad ngi kyntu shuh shuh ia ki bor jong ka ain ba kin tohkit shuh shuh ia u, ioh leh se dang bun ki ba u la dep pyniap.(SP News)
