Shillong, Nailur 25: U Myntri ba dei peit ia ki kam jngohkai u bah Metbah Lyngdoh haba jubab ia ka jingkylli jong u Bah Adelbert Nongrum u la ong ba ka sorkar kala ialeh katba lah ban kyntiew ia ki kam jngohkai pyrthei ha kane jylla da kaba shim ia bun ki lad kilynti kumno ban khring ia ki briew ba kin wan sha kane ka jylla.
La iathuh ba ka jingwan jong ki nong jngohkai pyrthei kila dangkiew na ka por sha ka por bad ha u snem 2017 ki nongjngohkai pyrthei na poh ka Ri India kila kot sha ka 990856 ngut bad ki briew kiba la wan na kiwei ki bynta ki ri jong ka pyrthei kila kot sha ka 12051 ngut.
Haba jubab ia ki jingkylli bynrap jong u Bah Himalaya Shangpliang, ha kaba u la kylli la leh aiu ka sorkar ban pynbha ia ki krem pubon ban khring ia ki nongwankai pyrthei,na ka liang jong u myntri u la ong ba ka sorkar kala ialeh ban bha ia ki lynti syngkieng kiba leit sha ki krem puban da kaba shna ia ki lynti iaid kjat.
Na ka liang jong u Bah Himalaya u iathuh hapoh ka iing dorbar ba ha Mawsynram ka don ka krem Mawjymbuin kaba da ki hajar ki briew ki wan ban leh riew blei sha kane ka jaka ha kaba ka sorkar ka lah ban ioh shibun ka pisa, ha ka juh ka por u la iathuh ba ka krem ba jrong tam ha pyrthei ka don ha Mawsynram.
