Shillong, Risaw 5: U Bah Sniawbhlang Dkhar MLA jong ka Nartiang ba dei ruh u myntri ha kane ka sorkar MDA, u la ong 
ba la dep ban pynkylla ia ka surok Ummulong sha Khamduli ban mih sha Harem ha Assam kum ka National Highway la dep ban phah sha ka sorkar pdeng.
Haba kren ha ki lat pahai khubor u la ong ba ia kane la dep ban phah ha ka por ba u dang bat ia ka tnad PWD bad na ka liang jong ka sorkar pdeng “Government of India” ka dang peit bniah ia kane ka skhim ia ka jingiaid jingieng ki kali na kane ka surok bad mynta kane ka kam ka dang sah bad ka sorkar pdeng.
Ia kane ka surok na Ummulong sha Khanduli ban mih sha Hamrem jong ka jylla Assam la dep ban pynheh bad ka jingangnud jong ki paidbah ka long lada lah ban pynlong ia ka kum ka National Highway.
Kumba ka long mynta baroh ki kali kiba hap ban leit sha Guwahati kiba wan mih na Tripura, Mizoram, Lower Assam kiba wan iaid lyngba ka jylla Meghalaya ki hap ban rung sha Ri Bhoi District namar kam don da kawei ka lynti la pynsngew ki katto katne ki riew rangbah.
Lada ka sorkar jylla kala lah ban pynsngewthuh ia ka sorkar pdeng ba pynkylla ia kane ka surok sha ka National Highway kan iarap ia ka leit ka wan bad kan kham pynlungkot ia ka lynti namar kane ka surok kan iasoh bad ka Jagiroad ha Assam.
