Shillong, Nohprah 03: U Myntri rangbah ka jylla u Conrad K Sangma mynta ka sngi la plie ia ka Lumshnong C&RD Block kaba hap hapoh jong ka East Jaintia Hills District haka jigniadon lang u bah Sniawbhalang Dhar myntri kam pynroi sor, jingiadon lang u MLA u bah Shitlang Pale, u MDC kane ka jaka u bah E Lamare bad ki ophisar sorkar.
Ha ka jingkren u myntri rangbah ka jylla u la ai khublei ia ka Joint Action Committee kaba la trei shitom khlem thiat ban pynthikna ban pynioh ia kane ka Lumshnong C&RD Block, la ong kane ka jaka kala shah riehshrah namar ka jingbym don ki ophis sorkar ha katei ka thain namar ki briew ki hap na leit da ki bun kynta ba poi sha ki ophis.
La ong ba da ka jingplie ia kane ka ophis mynta ka sngi kan iarap shibun ki paidbah kane ka thain na ka bynta ka jingdon kam ka jong ki, kane ka long ba ka sorkar ka kwah ba ka jingtrei kam jong ka sorkar kan don kham jan sha ki paidbah.
U mytnri rangbah u la ong ba kum ki briew kiba don ha ka sain pyrthei bad ki ophisar ka thong ka long ban ai ka jingshakri sha ki paidbah. Kane ka Block kaba plie mynta ka sngi kan kham pynsuk ia ki paidbah ha ka jingdon kam jong ki.
Ha kane ka sngi u mytnri rangbah u la ong ba ha kine ki san snem duna la shna shibun ki surok, ka jingpynpoi ia ka um sha iing ki sem, kaba kongsan eh ka long ba ka sorkar kala lah ban pynkiew ha ka jingpynlut na ka bynta ka jngdon kam ki paidbah da 40% bad ka jylla mynta kala dang kiew ha ki ban bun ki liang.
Haba ia dei bad ka surok Sonapur –Borghat ka sorkar kala mang pisa T.120 klur tyngka ban shna noh ia kane ka surok kumba 29.5 km bad la dep ruh ban buh ia u mawnongrim ban sdang trei noh, ha kane ka sngi la ai ruh ia ki jingiarap bapher bapher sha ki shnong bad ki thaw.
