Shillong, Iaiong 15 : Ka Jylla Meghalaya ka la long ba la pynkhreh nadong shadong ban pdiang burom ia ki Nongialam jong ki Ri ba pher ba pher ki ban wan iashimbynta ha ka jingialang G20 summit ‘Space Economy Leaders’ Meet (SELM).
U Principal Secretary ka Tnad Planning Shakeel Ahammad u la pyntip ba kin don haduh 28 ngut ki Heh OPhisar na ki Ri bapher bapher bad 100 ngut tam ki delegate kin wan ban iashimbynta kynthup ki technocrat.
U la ong ruh ba “Kan dei ka kabu ia ka Jylla ban pyni ia la ka jong ka deiti tynrai ba kham pher bad ka spah mariang, khamtam eh ka jingkhuid bad ka akor ka burom” namar “Ban wan kum kine ki Heh Ophisar sha la Jylla jong ngi ka long kaba jia shisien lano eh. U la ong
Shuh shuh u la bynrap da kaba ong ba “Ngi dei ban pyni ia kaei kaba bha tam khnang ba kin leit phai da ka jingkynmaw ba sngewtynnad ka ban iarap ban pyninam bad kyntiew ia ka Meghalaya kum ka jaka wan shangkai, kynshew kam bad ka roi ka par”
Haduh 28 ki startups (nongsengkam) ha ka Space Economy kin wan ban iashimbynta ha kane ka jingialang bad kin sa pyni ia kiei ki kam ba ki leh shabar jong kane ka jingialang.U la pynkynmaw ruh ba nalor ka ISRO, kan don ruh ka jingpynnam da ki kynhun startup ha ka Space Economy.
Ha katei ka sngi yn don lang u myntri rangbah ka jylla u Conrad K Sangma, u myntri khynnah ka sorkar pdeng ba dei peit ia ka pla pisa u Pankaj Chaudhury bad u myntri khynnah ba dei peit ia ka tnad Science u Dr. Jitendra Singh,u Amitabh Kant ba dei peit ia ka G20 Sherpa, u Secretary ba dei peit ia ka tnad suin u Somanath S bad u shongknoer ka SPACe Dr Pawan Kumar Goenka un ia donlang.
