Shillong, Naiwieng 13: Mynta ka sngi u bah Commander Shangpliang president jong ka Meghalaya Films Makers Association, u la pynlait paidbah ia ka phlim “Ki Ummat” kaba la pynmih da ka kynhun Kharsyntiew Production ia kaba la ring ia kane ka phlim ha u snem 2018 ia kaba yn sa pynmih paidbah naduh ka 19th Naiwieng 2021 ha Biju.
Haba kren ha kane ka jingpynlait paidbah ia kane ka phlim u bah Commander u la ong ba, ka rukom shna phlim ka long ar rukom kawei kaba ki leit lyngba ki YouTube, hynrei kine ki phlim kaba ki pynmih ka tang ban pyni ha ki Senima hall, la kyrpad ia ki paidbah ba kin ai lem ka jingkyrshan da kaba leit peit ia ki phlim khasi.
U President jong ki nongshna phlim khasi u la ong ban leit peit baiskop kam dei ka pop, la ong ba da kaba leit peit ka long ban ai ka jingkyrshan ia ki nongshna plim, ban ai mynsiem ia ki nongia shim bynta kum ki tynshong ki puron ha ka phlim kaba ki ioh ban pyni iala ka sap kaba ki don.
Ha ka juh ka por u bah Commander u la pynkynmaw ba kum ka seng kala ia kren bad ka sorkar ba kin ai kawei ka hall ban pyni ia ki phlim khasi, ym ba kin pyni khlem siew hynrei kin da siew da ka dor , hynrei kum ba ka long haduh mynta ka sngi sorkar kam sngewthuh ia kane.
La pynshai ruh ba mynta ym lah shuh ban pyni ia ki phlim khlem da ioh ia ka “CBFC” na ka sorkar, da ka jingshim ia kine kala buh ia ka jylla Meghalaya ha ka map ba kane ka jylla ruh ka pynmih ia ki phlim, ym tang katta haba ki pyni ia ki phlim ki siew ruh ia ka GST sha ka sorkar.
Kum kiba pynmih phlim ki kyntu ia ka sorkar ba kin wanrah ia ka polisi ha kaba ia dei bad ki kam pynmih phlim, kim pan ei ei na ka sorkar hynrei kiwah ban ioh ia ka polisi khnang ba kan long ka jingiarap ia ki nongak phlim, kiba pynmih phlim bad ka jingmyntoi ia ka sorkar.
Ha kane ka sngi ba pynlait ia kane ka phlim la don lang kiba pynmih ia kane ka phlim bah S. Kharsyntiew u bala thoh ia ka khana bad pyniaid ha kaba ring ia ka phlim, ki nongiashim bynta ha kane ka phlim kila ia don lang, kumjuh ki nongkyrshan ha kaba pynmih ia kane ka phlim “Ki Ummat”.
