La pynsangeh ia ki eksamin Class XII jong ki Board, yn pyllait ia ki resol  ha ka por ba biang

Shillong, Jylliew 1: U Myntri Rangbah Duh jong ka Ri u la pynlong ia ka jingiamir jingmut halor ki eksamin Class XII jong ka CBSE. Ki ophisar ki la ai jingtip ba bniah halor ki jingiakren ba la pynlong haduh mynta halor kane ka kam bad ki jingai jingmut jong kito kiba bon bynta ha kane ka kam kiba kynthup ruh ia ki Sorkar Jylla.

Namar ka jingbym thikna jong ka jinglong jingman ha kane ka khlam COVID bad katkum ki jingioh ia ki jingai jingmut na kito kiba don bynta ha kane ka kam, la rai ba yn ym pynlong ia ki eksamin Class XII mynta u snem. La rai ruh ba ka CBSE kan shim ia ki sienjam ban pynmih ia ki resol jong ki khynnah kiba pule Class XII katkum ki kyndon ba la buh bad ha ka por kaba biang.

U Myntri Rangbah Duh u la ong ba la shim ia kane ka rai halor ka jingpynlong ia ki eksamin Class 12 da kaba kynmaw ia ka bha ka miat jong ki khynnah pule. U la ong ba ka khlam COVID-19 ka la ktah ia ka kam pule puthi bad ba ka jingbym thikna halor ka jinglong eksamin ka la wanrah shibun ki jingkhuslai ha ki khynnah pule, ki kmie ki kpa bad ki nonghikai. Dei ban weng mardor ia kane ka jingkhuslai, la ong u Myntri Rangbah Duh.

U Myntri Rangbah Duh u la ong ba ka jinglong jingman jong ka khlam Covid ka dei kaba kylla na ka por sha ka por ha kylleng ka ri. Katba ka don ka jingduna ki case ha ka ri bad katba ki don katto katne ki jylla kiba la lah ban tehlakam ia ka jingpur jong ka khlam lyngba ki sienjam bapher bapher, ki dang don ruh ki jylla kiba la rai ban wanrah da ka jingpakhang dam.

Ki khynnah pule, ki kmie ki kpa bad ki nonghikai ki long kiba dap da ka jingkhuslai halor ka koit ka khiah jong ki khynnah pule namar kane. U Myntri Rangbah Duh u la ong ba ym dei ban phah ia ki khynnah pule ba kin leit ban shong eksamin ha kum kane ka jinglong jingman kaba dap da ka jingkhuslai.

U Myntri Rangbah Duh u la ban jur ba ka koit ka khiah bad ka jingshngain jong ki khynnah pule ka dei kaba kongsan bad ba ym dei ban khein sting ha kane ka bynta. U la ong ba hapdeng kine ki jinglong jingman ba mynta, ym dei ban buh ia ki khynnah pule ha ka jingma tang na ka bynta ka jingleh eksamin.

U Myntri Rangbah Duh u la ong ba baroh ki dei ban sngewthuh ia ki khynnah pule. U Myntri Rangbah Duh u la bthah ia baroh ki ophisar ba kin pynthikna ba ia ki resol la pynkhreh katkum ki kyndon ba la buh, ha ka jinglong ryntih bad ha ka por kaba biang.

Ha kaba kren shaphang ka jingiamir jingmut halor kane ka kam, u Myntri Rangbah Duh u la ai khublei ia baroh kiba la don bynta ban shim ia kane ka rai na ka bynta ka bha ka miat jong ki khynnah pule hadien ka jingiakren bad kito kiba don bynta ha kane ka kam na kylleng ka ri. U la ai khublei ruh ia ki jylla kiba la ai jingmut halor kane ka kam.

La rai ruh ba kum ha kane ka snem ba la dep, lada don ki khynnah kiba kwah ban leit shong eksamin, yn ai lad ia ki ban leh ia kane da ka CBSE ha ka por kaba kham plié lad ban pyndep ia kane ka kam.

U Myntri Rangbah Duh u la pynlong teng ia ka jingialang ha ka 21.5.21 halor kane ka kam ha kaba la iashim bynta da ki Myntri bad ki ophisar. Hadien kane la pynlong ia ka jingialang hapoh ka jingpyniaid jong u Myntri ka tnat Defence jong ka Sorkar Pdeng ha ka 23.05.2021 ha kaba la iashim bynta ki Myntri ba dei khmih ia ka tnat Pule Puthi jong ki Sorkar Jylla. La iakren halor ki lad ban pynlong ia ka eksamin CBSE ha kane ka jingialang bad la shim ia ki jingai jingmut jong ki Sorkar Jylla bad ki UT.

Ha kane ka jingialang mynta ka sngi, la iashim bynta da ki Myntri Sorkar Pdeng ba dei khmih ia ki tnat Defence, ka Pla Tyngka, Commerce, Information & Broadcasting, Petroleum bad Women & Child Development, u Principal Secretary jong u Myntri Rangbah, u Cabinet Secretary bad ki Secretary jong ki tnat School Education & Higher Education ha ryngkat kiwei kiwei ki ophisar.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet