Shillong, Naiwieng 02: Ka Khasi Student Union Jaintia Hills District Unit mynhynnin ka sngi ka la ioh ban pyniar iaka tnad treikam jong ka ha Nongbah Jowai bad iakane ka tnad treikam la tip kum ka KSU Jowai Unit.
Iakane ka tnad treikam thymmai la pynbam smai da u samla Ostarnic Marbaniang Organising Secy ka KSU Sengkmie katba iaka jingialang la pyniaid da u samla Morning Pasi President ka KSU Jowai Circle.
Hakane ka sngi la iadonlang ruh ki nongialam ka KSU Jaintia Hills District Unit kynthup ia u Samla SS Niangti, Samla Shaniahshkem Dkhar, Samla Kwilnes Suchiang, Samla Conard R Sana, Samla Cherity Suja, nangta u Vice President ka KSU Delhi Unit Samla Wallam Nongsiej bad kiwei kiwei pat ki dkhot ka KSU.
U Samla SS Niangti haba ai jingkren haka jingialang u la ong ba ka Jingkhlain ka Seng bad ka jingdon ki tnad treikam jong ka Seng ha kylleng ka Bri U Hynniewtrep ka pyniatylli iaka Jaitbynriew bad kan sa pynduh ruh iaka jingsngewiapher thaiñ.
Katba u Samla Ostarnic haba ai jingkren haka jingialang u la ong ba “Ka KSU kamdei tang ka stieh iada, Hynrei kadei ruh Ka Waitlam kaban mait Iakita Ki nongshun kiba thmu ban Pynpharia bad pynpait pynpra iaka Jaitbynriew” .
Haba pynpaw iaka jingsngewsih halor ka jingkhlad kynsan ka Meiieid Spility Lyngdoh Langrin, u Samla Ostarnic u la ong ” Ka Seng ka dap daka jingsngewsih kaba khraw haba ioh jingtip iaka jingkhlad kynsan i Meiieid Spility Lyngdoh Langrin namar i dei i longkmie iba ieng rangbah ban kyntait iaka jingtyrwa ka Sorkar India da ki spah klur ban ioh tih ia u Uranium na Domiasiat
“Ka Meiieid Spility Lyngdoh kadei ka nuksa kaba bha ia ngi kum ki dkhot ka Seng ba ngin ieng haka nongrim kaba shkem kumba ieng i Meiieid” u la ong shuh shuh.
Ha shwa ban pynkut iaka jingialang la ioh ruh iaka jingkren na u Samla Ewanmi Phawa President ba thymmai ka KSU Jowai Unit.
