Shillong, Lber 16: Ka seng United Democratic Party (UDP) ha ka sngi saitjian kala sdang ia ka jingialap election naka bynta kane ka MP ka ban sa long shen da ka jingwan plie jong u myntri rangbah ka jylla Nagaland u Neiphiu Rio, u Chairman jong ka North East Regional Political Front.
Ka UDP ka la shim ia ka rai ban trei shitom na ka bynta u Working President jong ka seng u Bah Paul Lyngdoh u ban ia aireng ha kane ka MP Election na ka 1-Shillong Seat.
Ha ka jingkren jong u myntri rangbah ka jylla Nagaland u Neiphiu Rio u la dawa na ka sorkar pdeng ba ka dei ban thaw ia ka ain ban ai kam ai jam ia ki paidbah , hynrei ha ka jaka jong kane ka la wanrah pynban da kata ka ain ban pynbiang bam.
U Rio u la ong ba kane ka ain ban pynbiang bam ia ki paidbah kan nym lah ban leh ei ei hynrei kan pynjot ia ka Ri, kane ka sorkar Congress ha Delhi kala wanrah ia ka ain ka hok ban ioh ban pule ha dien 50 snem ba ka Ri India ka la ioh ia ka jinglaitluid.
U myntri rangbah ka jylla Nagaland u la ong ba kum ka dong shatei lam mih ngi jong ka Ri India ka dei ban ia tylli kawei na ka bynta ban ia kren ia ki kam kiba ia dei bad kane ka thain sha ka sorkar pdeng kum ka jingshah niew bein jong ki briew kane ka thain.
U la ong ba ka jingsynshar jong ka seng Congress kan sa kut noh bad ka sorkar kaba thymmai kan sa wan. Ha kane ka jingialang la wan lang da ki nongialam jong ka seng UDP na kylleng.(SP News)
