Shillong, Jylliew 13: Ka seng Mawmluh Cherra Cements Employees Union (MCCEU) la shai ka sngi kin pynlong ia ka jingiakhih ha ophis jong ki kaba don ha Lachumier Shilong namar ka sorkarkam shym pynurlong ia ka jingdawa kaba ki la buh ha khmat ka sorkar la bun bnai mynta.
U President ka seng u bah Shanlang Diengdoh la pyntip ba ia kane ka jingiakhih kan long la shai ka sngi ha ophis jong ka Mawmluh Cherra Cement Limited (MCCL) kaba don ha Shillong kumba kila dep ban ioh ia ka jingbit na ki bor jong ka District Administration ka East Khasi Hills District.
Bah Diengdoh la iathuh ba kin sdang ia ka jingiakhih ha ka por 10.30 baje mynstep ha ophis ka MCCL ha Shillong, ka jingbit kaba kila ioh ka long tang na ka bynta shishila shai hynrei kin dang pan por shuh ba kin bteng ia ka jingiakhih katba ka sorkar kam pat jubab ia ka jingdawa jong ki.
Lah ban pynkynmaw ba ka MCCEU ka dawa na ka sorkar ba ka dei ban siew ia ka tulop jong ki kaba man u bnai, kaei kaba ki ioh mynta ka long tang ka jingiarap kaba ktah ia ka iing ka sem jong ki ban pyniaid namar ka jingioh bad ka jinglut kam ia hap ha iing ha sem.
Ka seng ka dawa ba ka sorkar kan ai biang ia skhim ban shongthiat noh khlem pat dei por, lada don kino kino ki nongtrei kiba kwah ban shim ia kane ka lat ban shong thiat khlem pat dei por kin lah ban shim, hynrei ka sorkar kam shym la jubab ia kaei kaba ki la dep ban buh ha khmat jong u mytnri rangbah ka jylla.
