The President, Smt. Droupadi Murmu administers the Oath of Office and Secrecy to the Prime Minister of India, Shri Narendra Modi during the swearing-in ceremony, at Rashtrapati Bhavan, in New Delhi on June 09, 2024.
New Delhi, Jylliew 16: U Myntri Sorkar Pdeng ba dei khmih ia ka tnat ka rep ka riang bad Rural Development, Shivraj Singh Chouhan u la iakynduh bad ki lad pathai khubor mynta ka sngi ha kaba u la pyntip shaphang ka jingpyllait ia ka bynta kaba17 kaba long kumba T 20,000 klur hapoh ka PM-KISAN da u Myntri Rangbah Duh, Narendra Modi.
U Myntri Rangbah Duh un leit sha Varanasi ha ka 18 tarik u Jylliew, 2024 ban pyllait ia kane ka bynta kaba17 jong ka skhim PM KISAN sha ki nongrep bad ka jingai ki syrnot sha palat 30,000 tylli ki self-help group kum ki Krishi Sakhi. Yn pynlong I akane ka prokram da ka tnat ka rep ka riang jong ka Sorkar Pdeng ha ka jingiatreilang bad ka Sorkar Uttar Pradesh.
Ha kane ka sngi yn don ka jingiashim bynta lang da ki kynrem ki lyndan, ba kynthup ia u Lat ka Uttar Pradesh, u Myntri Sorkar Pdeng ba dei khmih ia ka tnat ka rep ka riang,Shivraj Singh Chouhan, Yogi Adityanath, Myntri Rangbah ka Uttar Pradesh bad kiwei kiwei ki Myntri na ka Sorkar Uttar Pradesh.
U Myntri Sorkar Pdeng u la iathuh ba ha ka 18 tarik u Jylliew, ka jingseisoh jong ka jingkut jingmut ban don ka India kaba la kiew shaphrang ha ryngkat ka jingriewspah ki nongrep kan sa sdang. Namar ha kane ka sngi, katto katne ngut ki Myntri Sorkar Pdeng kin leit jngoh ia 50 tylli ki KVK ban iakren bad ki nongrep bad ai jingtip ia ki shaphang ki skhim bapher bapher jong ka tnat.
U la ong ba kumba 2.5 klur ngut ki nongrep kin iashim bynta ha kane ka prokram ha kylleng ka ri. 532 tylli ki KrishiVigyan Kendra (KVK), Palat 1.0 lak tylli ki Primary Agricultural Cooperative Society, bad 5.0 Lak ki Common Service Centre (CSC) na kylleng ka ri kin iashim bynta ha kane ka prokram ban ai jingtip ia ki nongrep. Ha Meghalaya, u Satish Chandra Dubey, Myntri Khynnah ka tnat Coal, Mines un iashim bynta ha ka prokram ka ban long ha ICAR, Umiam Meghalaya.
U Myntri Sorkar Pdeng ba dei khmih ia ka tnat ka rep ka riang bad Rural Development, Shivraj Singh Chouhan u la ai jingsngewnguh ia u Myntri Rangbah Duh uba la shaniah ia u ba un shimti ia ka tnat kaba kongsan kum ka tnat ka rep ka riang bad u la ong ba ka kam rep ka dei ka bynta kaba khraw tam ban pynurlong ia ka jingthmu ban don ka India kaba la kiew shaphrang.
U Shivraj Singh Chouhan u la ong ba ka kam rep ka dei ka nongrim jong ka ioh ka kot jong ka India. Wat mynta ruh, bun ki lad ioh kam ki wan na ki kam rep.
U Myntri Sorkar Pdeng ba dei khmih ia ka tnat ka rep ka riang u la ong ba mynta ki nongrep ki dang pyndap ia ki jaka buh mar bam jong ka ri. U la ong ba wat ha ki por ba la dep ruh, ka kam rep bad ki nongrep ki long ki bynta ba kongsan tam ia u Myntri Rangbah Duh Narendra Modi, bad namar kane, ki la don shibun ki sienjam na ka bynta ka bha ka miat jong ki nongrep bad wat mynta ruh.
Hadien ba u la shimti ia ka shuki, u Myntri Rangbah Duh u la soi nyngkong ia ka jingpyllait ia ka bynta kaba 17 jong ka Kisan Samman Nidhi ban ai sha ki nongrep. U Chouhan u la ong ba ka prokram kaba nyngkong hadien ba u la long Myntri Rangbah Duh ha ka sien kaba lai ka dei ka jingpyllait ia ka bynta kaba 17 jong ka PM KISAN kaba palat T 20,000 klur ban sam ia palat 9.26 klur ngut ki nongrep ba dei ban ioh jingmyntoi ia kaba yn leh da u Myntri Rangbah Duh da kaba shu shon ha u budam na Varanasi.
U Shivraj Singh Chouhan u la ong ba ka Kisan Samman Nidhi ka dei ka skhim Sorkar Pdeng kaba la sdang ha ka 24 tarik u Rymphang 2019 ban kyrshan ia ki jingdonkam jong baroh ki nongrep kiba don jaka haba ki hap hapoh katto katne ka jingkamai.
U la ong ba da kaba don ka jingshai ha ka jingkyntiew kyrteng ia kito kiba dei ban ioh jingmyntoi, ka Sorkar ka la pyllait palat T 3.04 lak klur haduh mynta sha palat 11 klur ngut ki nongrep ha kylleng ka pyrthei bad lyngba kane ka jingpyllait pisa mynta, baroh ka jingpyllait pisa sha kito kiba dei ban ioh jingmyntoi naduh ba la sdang ia kane ka skhim kan tam ia ka T 3.24 lak klur.
U Myntri ka tnat ka rep ka riang u la ong ba u Myntri Rangbah Duh u la kut jingmut ban don lai klur ngut ki Lakhpati Didi, bad na kine, la don mynta kumba shi klur ngut ki Lakhpati Didi bad ba shen yn sa don sa 2 klur ngut. Ka Krishi Sakhi ka dei shi bynta jong kane.
U Chauhan u la ong ba khnang ban iarap ia ki nongrep, la ai jinghikai ia ki longkmie khnang ba kin lah ban kyrshan ia ki nongrep lyngba ki kam bapher bapher kiba iadei bad ka kam rep ha kaba ki lah ruh ban kamai kumba 60-80 hajar ha ka shi snem.
U Myntri u la ong ba ha ryngkat ka prokram ban pyllait ia kane ka bynta jong ka PM Kisan, u Myntri Rangbah Duh un sam syrnot ruh sha palat 30,000 tylli ki Self Help Group (SHG) kum ki Krishi Sakhi bad ba kum ka dak jong kane, u Myntri Rangbah Duh un sam syrnot ia 5 tylli ki Krishi Sakhi.
Ia ka Krishi Sakhi prokram la sdang ha 12 tylli ki Jylla ha ka Phase – 1: Gujarat, Tanil Nadu, Uttar Pradesh, Madhya Pradesh, Chhattisgarh, Karnataka, Maharashtra, Rajasthan, Odisha, Jharkhand, Andhra Pradesh bad Meghalaya. Haduh mynta, palat34,000 tylli ki Krishi Sakhi na ki 70,000 tylli ki dei kiba la ioh syrnot kum ki Para-extension Worker.
U Shivraj Singh Chouhan u la ong ba da kaba sngewthuh ia ka bynta ba kongsan jong ki longkmie ha ki kam rep, ka tnat ka rep ka riang bad Rural Development ki la soi ia ka Memorandum of Understanding.
U la ong ba hapoh ka PM-Kisan, la ai jingiarap pisa haduh T 6,000/- ha ka shi snem ba phiah ha ki lai bynta man ka saw bnai, sha ki bank account jong ki longiing jong ki nongrep ha kylleng ka ri lyngba ka Direct Benefit Transfer (DBT).
Hapoh ka Pradhan Mantri FasalBima Yojana, la pynthikna ia ka jingshngain ha ki kam pisa ia palat 4 klur ngut ki nongrrep. U Chouhan u la ong ba u dap da ka jingkmen ba watla ka don ka jingkiewdor ha kylleng ka pyrthei, ka kam ban pynbiang ia ki sboh ha ka dor kaba jem ia ki nongrep da kaba ai subsidy haduh T 11 lak klur ka dang bteng.
