Shillong, Lber 02: Ka jingrakhe ia ka “Indian Panorama Film Festival (IPFF)” kan sdang la shai ka sngi ha kane ka nongbah Shillong bad na ka liang jong ka sorkar ka la pynbit pynbiang bha ba kan long kaba jop.
U Director jong ka tand pathai khubor jong ka sorkar jylla u Bah H M Shangpliang haba kren ha ki nongthoh khubor u la ong ba ka jingpynkhreh pynkhrum baroh kala iaid beit bad ka jingkhien ka long ba ki briew kin sa ia poi sha kane ka jingleh kmen.
Ia kane ka jingleh kmen la pynbiaid da ka tand Department of Information and Public Relations (DIPR) da ka jingiatreilang bad ka tnad Ministry of Information and Broadcasting (MI&B) lyngba jong ka Directorate of Film Festivals ka sorkar pdeng.
Kane ka jingleh kmen kaba saw sngi ka thong ka long ban ialeh kumno ban kyntiew ia ki kam pynmih phlim ha kane ka jylla Meghalaya.
Ha kane ka jingleh kmen kin wan bun ki nongak phlim kiba paw kum ka Karishma Kapoor, Kainaat Arora, Bruna Abdullah bad u Nawazuddin Siddiqui u lah ban wan sha kane ka jingleh kmen.
U Bah Shangpliang u la iathuh ba u Directors Anjan Dutt (The Bong Connection), Veena Bakshi (The Coffin Maker) bad ka Nishtha Jain (Gulabi Gang) kine ruh kin ia don lang ha kaba pyni ia kine ki phlim.
Ki phlim na Meghalaya – Ka Lad, Meshua & Melody bad ka Wym Hasa – ia kine ruh yn sa pyni ha kane ka jingleh kmen ha kine ki saw sngi. Kawei pat ka phlim kaba yn sa pyni ka long ka Ka Lad, kane ka dei na ka jylla Meghalaya kaba dei ka jong u Dondor Lyngdoh bad Gautam Syiem.
Kiwei ki phlim kin kynthup ia ka Taare Zameen Par, ka phlim Assamese ka Baandhan, ka phlim Manipur ka Leipaklei, ki phlim phareng pat ki long ka,Ship of Theseus bad Lessons in Forgetting.
Ia kane ka Flim Festival yn plie da u Lat ka jylla u Dr K K Paul bad u myntri rangbah ka jylla u Dr Mukul Sangma yn ia don lang ha kane ka sngi kaban sdang la shai ka sngi bad kan kut ha ka 6 tarik mynta u bnai.(SP News)
