Shillong, Lber 03: Ki nonghikai kontrak hapoh jong ka lama ka “Meghalaya Government Lower Primary School Teachers Contractual Association” mynta ka sngi kala sdang ia ka jingiakhih shah thngan kaba khlem buh por ban pynw sha ka sorkar ba balei ka shu pynsangeh kam syndet syndet ha dien ba ki la tei kumba shiphew snem ei ei ia ka kam hikai.
Kine ki nonghikai kontrak kiba la thung da ka sorkar kila sdang ia kane ka jingiakhih shah thngan mynta ka sngi bad kiba la wan ban ia shim bynta ki long na baroh ki District kiba don ha lum khasi bad kiba la wan ban ia shim bynta ha kane ka sngi sdang ki long kum ba 60 ngut ei ei.
U wei na ki nonghikai u ba don ha kane ka kynhun u bah Toyondar Mawlieh, u la iathuh ba ha kine ki sngi la dep ban pynlong ia ka jingiaid paidbah sha Garo Hills bad ki nonghikai na Garo Hills kiba dei na kane ka juh ka kynhun kin wan sha Shillong la shai ka sngi ne la shisngi ban ia shim bynta ha kane ka jingiakhih.
La iathuh ba ki nonghikai kontrak ha ki Government LP School ha ka jylla baroh kawei ki don palat ia ka shihajar ngut bad kine ki nonghikai kiba hikai kontrak la juh pynthymmai ia ka kam hikai jong ki naduh u snem 2010 ter ter haduh mynta dei tad haduh u Rymphang 2021 ba ki DSEO kim shym pynthymmai shuh ia ka kontrak.
Katkum ka jingbit kaba ka ophis jong ka Deputy Commissioner jong ka East Khasi Hills kala ai ban pynlong ia kane ka jingshah thngan kan kut la shai ka sngi saw baje jan miet, hynrei ka liang jong ka seng kan pan biang ia ka jingbit haduh ba ka sorkar kan ioh sngew ia ka jingeh jong ki, la ong u bah Mawlieh.
