Shillong, Lber 25: Ka phang kaba ka cabinet ka ia kren bha mynta ka sngi ka long halor ki marbam mardih namar ban khang 21 sngi kam long kaba suk ia ki paidbah ba kin shong ha iing bad ba khlem da ioh ia ki jingbam jingdih lane ban leit thied ia kano kano ka jingbam jingdih na kano kano ka jaka ban leit thied.
Haba kren ha ki lat pathai khubor u Symbut myntri rangbah ha iing sah jong u myntri rangbah ka jylla u la iathuh ba ka kabinet mynta ka sngi kala shim ia ka ia ka rai ba ka jingsam khaw rashon lyngba ki dukan rashon kan iaid kum ba buh iaid, ka sorkar kala shim ia ka jingkhein bad na ka bynta jong u bnai Lber bad Iaiong ka tnad sam bam kan sam noh ia u khaw katkum ka National Food Security Act, kato kan iaid kumba juh iaid.
Mynta na ka liang jong ka sorkar kala dep pan shuh shuh ia ka bhah na ka bynta u bnai Jymmang bad u bnai Jylliew, na ka bynta jong bnai Lber bad u bnai Iaiong ka jingdon jong u khaw ka biang ym dei ban khuslai. Hynrei ka sorkar kala don ka jingantad lpa bad dei halor kane bala pan shuh shuh ia u khaw na ka bynta u bnai Jymmang bad u bnai Jylliew.
Kiwei pat kiba lait na ki dukan rashon, namar ki don ar bynta, kawei kaba hap lyngba ka Public Distribution System (PDS) lyngba ka National Food security Act, ki don pat ki bynta kiba lait ki bym dei katkum kato ka Act, kaba mut ba hap ban thied beit na ki iew ki hat.
Haba ia dei bad kane ka bynta ka sorkar kala shim khia ba lada don kam ka sorkar kan thied, kaba lah ban long mynta bad ka jylla Punjab, Bihar bad kiwei kiwei ki jylla, ka sorkar kan thied bad ki wan rah na ka bynta kine ki sngi ban dang wan khnang ba u khaw ha iew ruh kan nym don kano kano ka jingduna ha iew ha hat.
Ha kaba ia dei bad u khaw, u Dai, ka umphniang, ki don 23 tylli ki jaitmar kiba hap hapoh ki mar bam. Halor kane ka cabinet kala ia kren ban pynthikna ba kine ki mar kaba ki paidbah ki don kam kin bit kin biang nadong sha dong.
Ha ka jingialang jong ka cabinet la shim ruh ia ka rai ba naduh la shisngi kata ka 27/03/2020 ha kaba ia dei bad ki jaka sor, kum ka Shillong, Tura bad Jowai ba kin pynpoi ia ki mar bam sha ki shnong ki shnong ha kito ki dukan.
Ka sorkar kan pynpoi ia ki mar ki mata bad ai lat da ka jingiasngewthuh bad ki bor shnong ban buh ia ka por ban pynlait ban die ba kito ki nongshong shnong hala ki jong ki dong ba ki paidbah ki lah ban leit thied ia ki jingbam na ka bynta kine ki 21 sngi ki ban dang wan kane kan long tang ha ki jaka sor.
Haba ia dei bad kane ka sorkar kala aiti sha ki Deputy Commissioner ba kin khang jingialang kyrpang ia ki rangbah shnong ban ia pynbeit ia ka por ba kumno ban plie bad ban khang ia kata ka dukan, ha ka juh ka por ban ia leh katba lah ban pynduna ruh ia ka jingia thyngian jong ki briew namar hap ban but ruh ia ka jingbthah ban nym don ka jingiajan para briew ban ia da ia une u khniang jingpang ba sherkhei.
Haba ia dei bad ki nongkyndong ka tnad sam bam kan hap ban pynbeit kumno ban leh khnang ba ki paidbah ha ki nongkyndong kin ioh ban leit thied ia ka bam ka dih ka jong ki katkum ka jingdon kam ia kane ki Deputy Commissioner kin sa pyntip sha ki paidbah baroh bad kum juh lyngba ki lat pathai khubor ban pyntip lem ia kane sha ki paidbah.
