Shillong, Naiwieng 04: Na ka bynta ban pyniaid beit ia ka 2nd North East Olympic Games 2022 kaba long hynriew sngi lynter ka ban sdang ha ka 10 bad kan kut ha ka 16 tarik mynta u bnai la jied 400 ngut ki nongkitkam ban trei khnang ba ki kam kin iaid beit iaid ryntih.
Kine ki 400 ngut kiba thung ban trei kin long ban peit na duh ka ain bam, ki jaka sah jong ki nongialehkai bad ki nongialam, Ka leit ka wan, ki ai jingsumar, ki lait pathai khubor, baroh ki jingialehkai ki don haduh 18 tylli ki jaid jingialehkai.
Kitei ki 400 ngut kiba la shah khot ban trei la ai jinghikai ia ki ha State Convention Centre, ha kaba la wan ban ia shim bynta na ka tnad ialehkai ka sorkar Meghalaya , u Shivansh Awasthi IAS bad ki ophisar.
Kine ki nongtrei kiba la thung ia ki ki hap ban pdiang ia ki nongialehkai na kiwei ki jylla kiba ban sdang poi sha kane ka jylla ha kane ka taiew kaba mynta bad ha kane ka shitaiew kin lah ban sdang ia ithuh ithaw bad ka sorkar kan siew ia kiba trei ryngkat kabai leit bai wan bad kane kan iarap ha ki por ban wan.
Man ki jingialehkai kin don nongiarap kiba la buh kyrpang na ka bynta kata ka kynhun ialehkai bad la kham phah bun ki nongiarap na ka bynta ka jingialehkai kynjat ball bad Basketball namar kin kham khring ia ki nongwan jngohkai.
U Awasthi u la shim ia ki jingkylli na kiba la thung ban iarap bad u la pynkymaw ia ki ba ki dei ban bat ia ka burom jong ka jylla Meghalaya ba kin ai ka jingshakri kaba bha tam khnang ba kiwei kiba wan na kiwei ki jylla ka thain shatei lam mih ngi ka Ri India kin sah kynmaw haba ki leit phai.
