Shillong, Naitung 14: U Deputy Chief Minister u Bah Prestone Tynsong u la iathuh ba ka sorkar kala wengnoh ia ka Lockdown shipor namar ba la dep ban lap ia kito briew kiba don jingia jan bad kiba leit iathoh sha Greenwood Resort ha Assam.
Baroh ki briew kiba la dep leh ia ka contact tracing ki long 198 ngut bad ka sorkar kan sa phah ia ki kyrteng jong ki tei ki briew sha ki COVID-19 committee khnang ba ki shnong kin peit ka long ba kine ki briew Kim dei ban ia khleh bad ki briew.
U Bah Prestone u la kren shai ba ha ka sngi kaba u Myntri Rangbah ka jylla u Conrad K Sangma u pynbna ia ka jingpakhang ha ka nongbah Shillong u la kren da kaba shai ba la pynjari ia ka jingpakhang ha kane ka nongbah Shillong ka long ban wat ia kito ki briew kiba don ka jingiajan bad kito kiba leit iathoh sha Greenwood resort ha Assam.
U bah Prestone u la ong ba kane ka jingweng ia ka jingpakhang ha kane ka nongbah Shillong ka long shipor bad ka sorkar kan sa dang ia shong ban peit bniah ia ka jinglong jingman, kumba ka long mynta ka jingtest COVID-19 positive ha ka jylla kala dang hiar.
Haba ia dei bad ki jingpyntip la ong ba ki paidbah ki dei ban shim tang ia kaei kaba wan na ka sorkar lyngba ki lat pathai khubor ka sorkar kan ai ia ki jingtip kiba paka sha ki paidbah ban iatip ia kaei kaba lajia bad kaei kaba ka sorkar ka leh na ka bynta ka jingshngian jong ki paidbah.
