Shillong, Kyllalyngkot 28: U Chief Executive Member jong ka KHADC u Bah Latiplang Kharkongor u la ong ba lada ka kong Grace M Kharpuri ka wan phai biang sha ka kynhun jong ki ruh u pdiang sngewbha namar ka kyrteng jong ka ka don ha ka list kaba la phah sha u Lat jong ka jylla.
U CEM jong ka KHADC u la ong ba ki kyrteng kiba la dep ban phah sha u Lat jong ka jylla ban ioh ia ka jingmynjur jong u ki long ka kong Grace Mary Kharpuri kum ka Dy CEM, ka kong Macdalyn Sawkmie Mawlong, u bah Lamphrang Blah, u Bah Mitchel Wankhar, Bah Ronnie V Lyngdoh.
U Bah latiplang u la ong ba lada ka kong Grace M Kharpuri kam treh wanphai shuh sha kane ka kynhun ruh ki hap ban pyntip sha u Lat jong ka jylla katkum ka lynti, u CEM jong ka KHADC u la ong ba u kyrmen ba lyngba kane ka rai jong ka iing bishar yn sa ioh noh ia ka jingmynjur jong u Lat ia ki EM hapoh ka EC jong u.
Haba ia dei bad kiwei ki EM kiba dang sah, u Bah Latiplang u la ong ba yn sa phah ia ki kyrteng jong ki EM sha u Lat jong ka jylla ban pyndap ia ki shuki kiba dang thylli. Ha kane ka sngi na ka liang jong ki MDC kiba don ha ka UPF kila ia wan ban ai khublei ia u CEM.
U bah Banjop Pynrongope MDC jong ka Congress u la ong ba kala don ruh ka jingiakren bad u MDC jong ka Mairang ba un wan phai biang sha ka party Congress , u la ong ba ki don ka jingkyrmen ba u tei u MDC u bah Batkshem Ryntathiang yn sa wan phai biang sha ka Congress.
