Shillong Jymmang 29: Ka Hynniewtrep Youth Council (HYC) mynta ka sngi ka la ong ba lada ka sorkar kam lah ban pynbeit ia ka Reservation Policy, ka seng ka kloi ban pan noh la ka jong ka jylla.
Ia kane la ong da u President ka HYC u bah Robertjune Kharjahrin haba kren sha ki lad pathai khubor hadien ba ka seng ki la leit ban ai mynsiem ia ka jingshong shah thngan jong u nongialam ka VPP u bah Ardent ha Additional Secretariat.
U President ka HYC u bah Robertjune Kharjahrin, u la ong ba ka jingdawa ban pynkylla ia ka State Reservation Policy kam dei ka mat kaba pyniohnong ia kano kano ka Seng Sain Hima hynrei kadei ka mat ba ka jaidbynriew ka la angnud naduh mynshwa.
U bah Robertjune u la kynnoh ruh ba ka sorkar ka la pyrshang ban pyndonkam bakla ia ka Roster bad ka pyrshang ruh ban wanrah ia ka jingthep kam kyrpang tang ia kawei ka jaidbynriew kaba pynlong ia kiwei pat ki jaidbynriew ban duh jingkyrmen.
Ka jingbym treh ka sorkar ban iakren halor ka Reservation Policy, kadei namar ba ki nongialam ka sorkar kidei na kawei ka jaidbynriew,” ong u bah Robertjune.
U la ong ba la 50 snem kane ka Policy ka la shakri tang ia kawei ka jaidbynriew bad la donkam ban pynbeit noh khnang ban long kumjuh bad na ka liang ka seng ka ieng halor ka nongrim ba ka sorkar ka dei ban pynkylla noh ia ka Reservation Policy kaba la noh shilliang
Halor ka jingkwah ka seng ACHIK ban iakren ban wanrah noh ia ka Winter Capital hapoh Garo Hills, u bah Robertjune u la ong ka seng HYC ruh ki kwah ban iakren ban don noh ar tylli ki Budget ha ka jylla kata ka long ka Garo Hills Budget bad Khasi Jaintia Hills Budget.
Lada ki kwah ban iaid ban phiah noh la ka jylla, ngi ruh ngi kloi ban iaid noh shata,” u la ong bad bynrap, Kane kadei ka kam ba khia bad kaba ktah hynrei ngi dei ban ialeh ban weng ia kane ka jingeh khlem ai ding.
U la kyntu ruh ia ki Myntri sorkar bad ki MLA bad ki sengbhalang ba kane kadei ka kam ba khia bad dei ban pyrshang ban weng ia ka jingeh da ka jingsngewthuh jingmut ym da kaba ai ding.
