Shillong, Risaw 14: Ban pyrshah ia ka “ Public Hearing” kaba la buh da ka Meghalaya State Pollution Control Board (MSPCB) ka baba la buh ban long ha ka 19 tarik mynta u bnai na ka bynta ba ka Star Cement kan shim jaka shuh sa 42.051 hektar ha shnong Brichyrnot ka “ Ophis jong ki 6-Shnong Wah Association” ryngkat bad ka Sonapyrdi Tourism and Economic Development Society kila leit ban ai ia ka jingujor sha Secretary jong ka pollution mynta ka sngi.
Haba kren ha ki lad pathai khubor mynta ka sngi ha Shillong Press Club ha dien bala wan ban buh ia katei ka jingpyrshah halor ka jingthmu ban pynlong ia ka jingsngap paidbah ha ka 19 tarik mynta u bnai ha shnong Brichyrnot, u Bah Daiapherbha Lamare Secretary jong ka 6-Shnong Wah Lukha Association la ong ba ka seng kan leit ban ujor beit sha Supreme Court.
Ka daw jong ka jingpyrshah jong ki paidbah na ki hynriew shnong ka long ba lada ka sorkar ka dang ai jingbit ia ka Star Cement ban shim jaka shuh sha 42.051 hektar ka Wah Lukha kan sa juh, ka jingkylla rong jong ka Wah Lukha dei na ka jingbret jakhlia jong ki karkhana shna dewbilat kiba don ha katei ka thain.
Ka jingkylli ia u myntri rangbah ka jylla u Conrad K Sangma ka long hato ka jingpyrta ban pynneh mariang bad ban kyntiew ia ki kam jngohkai pyrthei kan long tang ha Shillong, katba sha Jiantia Hills yn ia pynjot ia ka mariang, u myntri rangbah u hap ban jubab ia kane.
La ong ba ka tand khlaw jong ka sorkar kaba dei peit ia ki mrad khlaw kala pynmih bad thoh ha ki signboard “Eco Sensitive Zone” hynrei halor kane ka jingkwah shim jaka shuh ka Star Cement kam shym kren ei ei haduh mynta. Kane ka jaka ba ka Star Cement ka kwah ban shim jaka ka long ha jan bad ka Narpuh Wildlife Sanctuary, ka don sa ka krem Korsati, ka Krem Umlawang.
Haba jubab ia ki jingkylli u Bah Daiapherbha u la ong ba kin nym leit ban ujor sha ka NGT namar ka NGT ka dang dei tang ka Tribunal bad ka dang hap hapoh jong ka Supreme Court, namar ki la iohi ba ha u snem 2013 kala phah ia ki jingthoh sha ki shnong ban jurip ia ka wah Lukha hynrei haduh mynta kim pat pynmih ia ka kaiphot.
Halor ka jingkylla rong ka Wah Lukha katkum ka kaiphot jong ka MSPCB kala kdew ba dei na u Dewiong, u Bah Daiapher bha u la ong ba u kubur ia kata, namar ki karkhana dewbilat ki pyndon kam dewiong, hynrei ban ong ba ka dei na ki par dewiong yn nym pdiang ia katei ka kaiphot.
U Bah Renimon Shylla dkhot jong ka East Jiantia Hills Swimming Association u la ong kumba ka long mynta da ka jingdon ia ki karkhana shna dewbilat ha katei ka thain kala pynjulor ia ka mariang bad lada dang ai jaka shuh kan dang pynjot shuh shuh ia ka mariang dei halor kane ba ki pyrshah ia kane ka jingthmu ban shim jaka shuh ka Star Cement.
U Bah Min Lamare rangbah shnong jong ka Shnong Kuliang u la ong ba, kane ka wah Lukha kaba da ki phew tylli ki shnong pyndon kam ia ka mynta kim nud shuh ban pyndon kam ia um na kane ka wah namar kala jahboh bad lada dang shah shuh ia ka star cement ban shim jaka shuh kan dang pynjot shuh shuh.
