Shillong 26 Lber: U Chief Executive Member ba thymmai jong ka KHADC u Bah Ardent Miller Basaiawmoit ha ka iing dorbar KHADC mynta ka sngi, u la ong ba lada ki Khasi kim ioh shuh ban bat ia ka khyndew ka shyiap halade , ka long kumba la iap.
Haba jubab halor ka motion ba la wanrah da u MDC ka Jirang u Bah Victor Ranee hynne hapoh ka iing dorbar halor ka jingrejister ia ki jaka ki puta , u Bah Basaiawmoit u la ong ka Executivecommittee ba la ialam da ma u, kan ai lad ia ki briew kiba sah ha ka thain khappud ban wan rejister ia ki jaka khlem da donkam siew eiei.
“Bad ngim lah ban shu leh kumne, namar ba ngi hap ban pyrkhat laka don ne em ka jingiadei bad ka ain, namar ba khlem ioh jingkyrshan na ka ain, ka jing rejister ia ki jaka kam long kaba khlain”, la ong u Bah Ardent bad bynrap, ba ka EC kan shong pyrkhar halor kane, ban thaw ia ki lad ki lynti kumno ban thaw da ka ain, ban pynkhlain ia ka
jingrejister ia ki jaka hapoh u pud u sam ka KHADC khnang ba kito kiba don ha khappud bad ka Assam, kin nym leit noh.
“Ngi donkam ia ka Land Law, ym da ka Land Bill”, la ong u CEM. Ha kajuh ka por, u la ong ia ki nong pyniaid shnong kiba ju mlien ban die ia ki jaka jong ki paidbah. Katkum ka jingong u Bah Basaiawmoit, kisordar, ki Syiem, ki Myntri bad kino kino ki bor synshar shnong, kim lah ban kam trai ia ki jaka bad ka bor jongki, ka long ban synshar ia
ki khlieh briew.
U CEM u la kren ia kane ha kaba don bun ki jaka ki puta kiba dei jongka shnong bad jong ki raid, jong ki Hima, la leh donbor da ki nong pyniaid shnong, ki Syiem na ka myntoi ialade shimet.(SP News)
