Jowai, Kyllalyngkot 19: U MLA ka Mowkaiaw u Bah Robinus Syngkon ha ka jingleit ka jong u sha ka shnong Borate ban tip ia ka jingbym ioh um kane ka shnong, ha ka jingjurip jong u u la lap b aka daw jong ka jingduh um ka dei ba ki pipe kila sarang lut namar ba la ring ia ka um ha kane ka shnong ka long naduh u snem 1988.
Ha kane ka jinghiar jurip jong u MLA, uba la hiar shaduh ki jaka ba pyniaid ia ki pipe um lyngba ka khlaw, la ioh ban sakhi ba ki pipe um kiba rim ia kiba la pyndait naduh u snem 1998 ki la bam sarang bad pei thliew lut, ka bym long shuh satia ban pyniaid ia ka um lyngba kine ki pipe. Kane ka jingbym lah shuh jong ka PHE ban sam um kaba la buh ha ka jingeh ia ki paidbah ha kaba ki la hap ban shu thied ia ka um.
Kine ki pipe um kiba rim dei kiba la pyndait naduh u snem 1998 kaba la wan lyngba ka Barato Water Supply Scheme ia kaba la pyntrei ha ka jinglut kaba la kot sha ka palat T.2 klur hynrei mynta kine ki pipe kim long shuh namar ba ka jingim jong kine ki pipe la ong ba ka dei tang kumba 15 snem eiei.
Na ka liang u MLA hadien ba u la ioh jingtip halor ka jingeh bad jingjynjar ba kum ki paidbah ka thaiñ Barato ki la mad namar ka umbam umdih, khlem da pynslem mar mar u la shimkhia ia kane ka kam bad ruh ban iakren bad ki bor ka tnat PHE RWS Division, Jowai ban wad ki lad ki lynti kumno ban maramot ia kine ki pipe um. Kumjuh ruh na ka liang u Executive Engineer bad ki ophisar kane ka tnat ki la shimkhia bad la sdang ban pyntrei ha ka ban bujli noh ia kito ki pipe kiba la bam sarang bad pei thliew da ki pipe kiba thymmai.
Ka jingpyntrei bad maramot ia kine ki pipe um ka la sdang naduh u bnai Nohprah jong u snem ba la lah bad la ong ba kan shim por sa tang kumba shi bnai ban pyndep, ha kaba yn sa lah ban sam biang ia ka umbam umdih sha ki nongshong shnong ka thaiñ Barato.
Ha kane ka sngi jurip ia u MLA la synran lang da u Executive Engineer, SDO, ki ophisar ka tnat PHE RWS Division, Jowai, u Rangbah Shnong ka Barato, ki riew rangbah bad kiwei kiwei bad la iohi ba watla ka jaka ka long riat bad khohruh khohram bad kaba buh jingeh ban iaid, hynrei na ka liang u MLA khlem da pyrkhat ia kita ki jingeh u la hiar ban sakhi da lade ia kine ki pipe ban lap ia ka jinglong jingman bad la iohi ba ka jingmaramot na ka liang ka PHE ka la iaid shaid shaid. Na ka liang u MLA u la kyntu ia ka tnat PHE ba kin ialeh katba lah ban pynsted ia ka kam, khnang ba yn lah ban weng ia ka jingeh jong ki paidbah.
Na ka liang ki riew rangbah kiba la synran lang ia u MLA ha kane ka sngi, ki la pynpaw ia ka jingsngewnguh bad ai ka jingiaroh ia u Bah Robinus Syngkon uba la kloi ban shimkhia bad wat ruh ban hiar jurip da lade ban lap bad iohi da la ki jong ki khmat ia ka jinglong jong ki pipe.
Watla na ka liang ka PHE ka la pyniaid shaid shaid shakhmat ia ka kam, hynrei ki la pynpaw ruh hakhmat u MLA ia ka jingeh ban ialeh ban pynbit pynbiang ia ki pipe um, namar lada don kino kino ki jingjia kum ka jingkhyllem ki dieng ne ka jingpei thliew ki pipe yn lah ban maramot tang ha ka por tlang namar ha ka lyiur yn nym lait satia ban rung sha kane ka khlaw.
Kumba ka long mynta na ka liang ka PHE ka la ring ia ka um na ka tyllong um kaba don hajan ka pump Manik ha shnong Khlieh Umbuit bad pyniaid ia ki pipe haduh 23 kilometer ban pynpoi sha ka thaiñ Barato kaba buh shisha ha ka jingeh ia ka tnat PHE.
