Shillong, Ïaiong 17: U ma K. Pohshna uba dei u Waheh Shnong ka Pdengkarong West Jaiñtia Hills hadien ba u la dep ban ai injek ïa ka dawai ïada na ka jingpang khlam Covid-19 hapoh ka PHC Jaraiñ kaba hap hapoh ka Amlarem Sub-Division West Jaiñtia Hills District ha kane 14 tarik mynta u bnai.
U bah Pohshna, ula buh ka jingkyntu ïa ki paid nongshong shnong ka Amlarem Constituency ba kim dei ban leh sting pyrshah ïa une u khlam jingpang hynrei ki dei ban shim khia ban leit shah injek ïalade ha ki PHC kiba don hapoh ka Amlarem Sub-Division khang ban ïoh jingïada.
Kum u nongïalam shnong kumjuh ruh u Chairman jong ka Village Management Committee Covid-19 bad u Adviser Synjuk Waheh Shnong War Jaiñtia, u shim ïa kane ka kabu ksiar ban kyntu jur ïa ki paidbah nongshong shnong.
Na ka liang jong u Waheh Shnong u kyntu ia ki para Waheh Shnong ba kin shim khia ban pynbna paidbah katkum ba la pynbeit da ka tnad ka koit ka khiah ba ïa mynta kiba nyngkong ban shah injek kin dei ki ba naduh 45 haduh 60 snem ka rta khnang ba kin lait na kino kino ki jingpang bad ki jingsngewsih.
Ula kyntu ïa ki PHC ki ba hap hapoh ka Amlarem Sub-Division lyngba ka Health Department ba kin ïarap lem ban shim khia ban ai injekshon bad ban register ïa ki kyreng jong ki paidbah ki ba ladep shah injek.
La pynbeit ruh lyngba ki Committee Shnong ba ki briew jong ka Health ba kin wan ai injek sha ki shnong khnang ba kan kham pynsuk ki longkmie longkpa kiba la 60 snem ban wan dalade sha ki PHC namar ka jingjngai ki lynti.
Sha shisien na ka liang u Bah K. Pohshna u la kyrpad jur ia ka sorkar bad ïa ki Waheh Shnong ki ba hap hapoh ka West Jaiñtia Hills ba kin ïa treilang ryngkat ryngkat khnang ban wanrah ïa ka shong suk shong saiñ bad ka koit ka khiah hapoh ka Amlarem Sub-Division.
U ma Pohshna ula bynrap ruh ba ym bit ban kynnoh ïano ïano ruh namar kane kadei ka jingpang kaba ktah ïa ka pyrthei baroh kawei, hynrei dei ban don ka mynsiem ban ïatrei lang khnang ba yn lah ban rad dyngkhong ïa kane ka jingpang khlam ha ka thaiñ bad ka jylla hi baroh kawei.
