Shillong 15 Iaiong: Ka Chairperson jong ka Meghalaya Legislature Assembly Committee halor ka Empowerment of Women, ka kong Santa Mary Shylla mynta ka sngi ka 15 tarik u Iaiong kala leit ban jngoh ia kawei ka long iing ha Langtor kaba hap ha Eastern West Khasi Hills District.
Kane ka jingleit jngoh ka long ban pynpaw ia ka jingsngewlem bad ban ai ka mynsiem sha kiba ha iing ha sem bad kiba haiing hasem halor ka jingkhlad noh ka (L) kong Darisha Lyngdoh bad u khunlung uba dang ar bnai.
Ha kane ka jingleit ban jngoh ia ka kong Santa Mary Shylla la ia synran lang da ki para dkhot jong ka Committee, kiba la leit ban jurip ruh ia ka jaka ba lap ia ka met kine ki ar ngut bad ha kane ka jingleit kila pynlong ka jingsngap jar baa r minit.
Hadien kane ka kynhun ki la leit sha Mairang Police Station, ha kaba ki la iakren bad u Additional Superintendent of Police u u Bah Pyrkhatlang Suchiang, bad u Ophisar-in-Charge ban bishar bniah ia ka jinglong jingman bad ka jingiaid ka jingtohkit kaba dang iaid shakhmat.
Ki dkhot ka Committee kiba la synran lang ia ka Chairperson ki kynthup ia u MLA ka Mawphlang u Bah Matthew Beyondstar Kurbah, u Bah Adelbert Nongrum MLA ka 17 North Shillong bad u Bah Brightstarwell Marbaniang MLA ka Mawlai bad kumjuh ruh ka DC jong ka Eastern West Khasi Hills District nalor kiwei pat.
Na ka liang ki dkhot ka Committee kila pynpaw ban shim khia halor kane khnang ba ki lanot kin ioh ia ka jingbishar bah ok bad kumjuh ruh ban iada ia ka hok jong ki kynthei bad ki khynnah, bad ban kyrshan ia ki longiing kiba shah ktah.
