Shillong, Jylliew 29: Ka Meghalaya State Olympic Association (MSOA) ha poh ka jingialam u bah John F Kharshiing kum u President bad u bah Finely Pariat kum u General Secretary ki la pyntip ba na ka liang ka MSOA ka la ioh ban leit jngoh la kumba lai sien laiwat ia ka jaka ka ban ioh ban pynlong ia ka Meghalaya Olympic Games ia ka bayn ioh ban pynlong ha Jowai.
Ha ba ioh ban ia kren bad ki nongthoh khubor na ka liang u bah John F Kharshiing u la ong ba ha kane ka jingleit jurip jong ka MSOA ia ka West Jaintia Hills ka ban ioh ban pynlong ia ka Meghalaya Games ka ba 6th ia ka ba la synran lang da ki District Sports Officers, ki enginer jong ka tnad sports.
Ki nongmih khmat na ki kynhun ia leh kai bapher bapher ki ba kynthup ia ki President bad Secretary bad kiwei kiwei. Ha kane ka jingleit ban jurip la ioh ban peit bniah ia ki jaka ialeh kai ha ka ba la lap ba ka West Jaintia Hills ka don ia shibun ki Stadium bad Indor Hall bad ka lah ban tang khyndiat ki ba hap ban shna kyrpang.
U Bah Kahrshiing u la ongruh ba ka long ka ba donbok ba ki jaka ki ban pynlong ia ki jingialehkai kim da jngai na kawei sha ka wei pat ha ka ba na ka laing ka MSOA kam da don kam ban buh ia ki kali kyrpang ki ban kit ia ki nongialeh kai.
U la pyntip ruh ba ha kane ka Meghalaya Games ban wan ki ladon sa kiwei pat ki Discipline ki ba la wan ban pan ha ka ban ioh ban kynthup lang ia ki ha ki jingialeh kai Olympic hynrei na ka liang ka MSOA ka la pyntip ba ia kine baroh yn bishar kat kum ka jingdon jong ki jaka ban ialehkai bad kumjuhruh ha ka ba iadei bad kiwei kiwei pat ki jingdonkam.
U la ong ruh ba ka thong jong ka MSOA ka long ba la kumo kumo kin lah ban pynlong ia 40 Tylli ki jait jingialehkai ka ban longruh kum ka jingpynkhreh ia ka National Games ka ban ioh ban pynlong ha ka jylla.
U Bah Kahrshiing u la pyntip ruh ba na ka ling ka Sorkar Jylla ha dien ba ki la dep ban ioh ban pynlong ia ka North East Games ka la ai ka jingkyrshan ba pura ia ka MSOA ha ka ba iadei bad ka jingpynlut pynsep ha ka bam bad kiwei kwiei pat ki jingdon kam bad kumjuh ruh ka la long ka jingkyrkhu ia ka Garo Hills ha ka ba ka la ioh ban plie ia ka Athletic Track ka ba nyngkong eh.
U bah Kaharshiing u la ong ruh ba ha kane ka kynti ba mynta ka jingpynlong ia ka Meghalaya Games ha Jowai kan kham iarap khyndiat ha ka ba iadei bad ka jinglut jingsep ha kaba bun na Ki Association ki la mynjur ia ki Jaka ban pynlong ia ki jingialeh kai bad u la bynrap ruh ba ki lah ban don tang kato katne ki ba hap ban shna.
U bah John u la pynpaw ka jingsngewnguh ia ka Sorkar ka ba la wan rah ia ka Sports Policy ha kane ka policy la kynthup ha kane ka policy ba ka State Games ka dei ban don ki ba dei kat kum ki kyndon ialeh kai jong ka International Olympic Association. U la ongruh ba ki dei ban don ruh ki District Activities, dei ruh ban don ka Physical Education bad kiwei kwie pat ki subject.
Ka Meghalaya Games kadei ka wei na ka thong jong ka Sports Policy. U la ong ruh ba ka jingdon jong ka Sports Policy ka la iarap ban ai ka jingkyrshan ba pura sha baroh ki Association ha ka ba iadei bad ki kam ialehkai.
