Shillong, Lber, 28: Ki lai tylli ki seng bhalang na ka thain Mawlai kiba kynthup ia ka KSU, FKJGP bad HNYF, kila leit ban jurip ia ka jingsiang ia u ph;lang plastic ha Madan Heh, Phudmuri, Shillong, kala sep ei na ka daw ba u kontraktor uba pyntrei ia kane ka kam ym shym la poi lang ha kane ka sngi.
Wat la u kontraktor u khlem poi sha kane ka jaka na ka liang jong kitei ki lai tylli ki seng kila pynlong ia ka jingjurip ban lap ia ka jingshisha la ka jingtrei ka long kaba biang ne em. La ong u bah Marbud Dkhar, President ka FKJGP. “ka jingleit jurip jong ngi ki Sengbhalang ia ka jingpyntrei ia kane ka madan ka long hadien ba ngi la ioh ujor na ki paidbah ba ka jingtrei kam da long kaba janai. Ban pynshisha ia kane ka jingkren jong ki briew, ngim banse ban wan jurip hi da la ki jong ki khmat.”
U ong ruh ba na ka liang ki Sengbhalang ki kwah ban tip shai la ka jingpyntrei ia kane ka madan la mang pisa neem na ka bynta ban pynbha ia ka Gallery, ki nala, ki painkhana kiwei kiwei ki jingdonkam nalor kaba siang ia u phlang plastik.
Haba kynthoh halor ka jingbym lah wan jong u Contraktor, une u nongialam ka FKJGP Mawlai Circle u la ong, “ngi ladep pyntip sha u trai jong ka kam pynban um shym la wan mih satia. Ngin sa pyntip biang bad lada um burom, ngim banse ban khang ne wat ban pynsangeh shwa ia ka jingtrei.”
U Bah Donbok Kharlyngdoh, President ka KSU Mawlai Circle haba bynrap halor kane u la ong, ki kwah ban tip haduh katno bnai la buh thong ban pyndep ia kane ka jingtrei bad ia ka pisa ba la mang na ka bynta kane ka jingtrei. “Ka jingbym lah jong u trai kam ban wan haba ki la khot ka pynsuba ia ngi ba ka don kaei re kaei sha lyndet la kynnoh. U la ong bad bynrap, “ka jingangnud jong ngi ka long ba kane ka madan kan ai jingmyntoi ia u paidbah ym ia u Contractor.”(SP News)
