Shillong, Iaiong 03: Mynta ka sngi ki dkhot jong ka seng KSU bad ki paidbah kila leit ban tur sha Sohra Police Station ban pan jingpynshai halor ka jingshah kem ki ar ngut ki dkhot ka seng u samla Shanborlang Shati bad u samla Mesadapbor Skhembil ha kti jong ki pulit halor ka jingkynnoh ba ki suba don kti halor ka jingiap jong ki ar ngut ki briew ha Ichamati.
Ia kane ka jingleit tur sha Police Station la ialam da u samla Ruben Najer Assistant General Secretary ka seng KSU seng kmei, ha kane ka jingleit ha kaba sdang ki bor pulit kim shym la shah banrung hynrei ha dien la khot ia ki nongialam ka seng ban ia kren bad ki pulit halor katei ka jingshah kem ki ar ngut ki dkhot ka seng.
U samla Ruben Najer haba kren sha ki dkhot ka seng bad ki paidbah kiba la wan ban ai ka jingkyrshan ia ka seng ha kane ka jingwan tur sha police station la ong ba kila kylli balei da kem ia ki dkhar ia ka kyrteng jong ki la buh rieh bad lada kem ia ki dkhot ka KSU pat la pynpaw ia ka kyrteng bad jala sah ruh.
Halor kane na ka liang jong u SDPO ka Sohra la ong ba ia kate ymdei ban la leh na ka liang jong ki hynrei la leh na Shillong, na ka liang u samla Ruben la kren da kaba shai ba ka ain ka long kum juh ia baroh, lada ia ki dkhot ka seng la pynpaw kyrteng ia ka kyrteng jong ki dkhar ruh dei ban pynpawlang kam dei ban noh shilliang.
Ha kane ka jingiakren na ka liang jong ki pulit kila kren shai ba ki kem ia ki halor ka jingsuba ym ba ki dei kita ki nongpyniap briew, hynrei ka ei kaba kila pynpaw sha ki lat pathai khubor pat kumba ki dei k nongpyniap.
Ha kane ka jingiakren la ong ba lada ki ar ngut ki dkhot ka seng kiba la shah kem kim don kti ki pulit kinpan map na ki paidbah a khmat ki lat pathai khubor, ka seng kala iohi ba na ka por sha ka por ki dkhot kila shah kem sha bom ha ki pulit tang ha ka jingshah kynnoh.
Ka khubor sha ki pulit ka long ba ka kam jong ki ka long ban peit ia ka shong ia ka shong suk shnong sain hynrei da kaba kem ia ki dkhot ka jaidbynriew wat mut ba kan don ka shnong suk shongsain, la ai khublei ia ki paidbah kiba la wan ban kyrshan ia ka seng bad ai mynsiem.
Kaei kaba la jia ia kine ki ar ngut ki samla ia ka rai kin shaniah ha ka iing bishar bad kin ia leh ban pynlait jamin noh ia kine ki ar ngut ki dkhot ka seng ha kin ki khyndait sngi ki ban wan, ha kane ka jingiakren kila kren ia ki pulit ba kim dei ban ia ki dkhot ka seng tang ha jingsuba bad ka seng kan nym ailat.
U President jong ka KSU South Khasi Hills District u samla Ribok Diengdoh la ong ba u hap ba mih namar kim kwah ban iohi ba ki dkhot ka seng kim shah kem bad ha ka juh ka por la ong lada don kam ban wat ia ki dkhot ka KSU dei ban khot ha ka por mynsngi mynshai, ym dei ban wan shiteng miet shiteng synia ban khynra kum ki lehnoh.
La ong ba ki pulit kila wat nyngkong ia u hynrei kim ioh ia u ki kem ia kine ki ar ngut . Balei ban thwet tnang ia ki dkhot ka KSU thwet lang ia ki nongleit iew leit hat bad ia ki bar jylla kiba iaid ha katei ka jaka.
