Shillong, Naiwieng 28: Ki ar ngut ki rangiakura ka Jylla ki la mad ia ka jingshah rem ha ka pre-quarter jong ka 7th Elite Men’s National Boxing Championship, hynrei ki la lah ban pyni ia ka mynsiem iakhun hakhmat ki paidbah nongkyrshan.
Kine ki kynthup ia u Badonkupar Synnah bad Bhalang Shadap, kiba la khur jingjop ha ka wat kaba nyngkong myn ha ka sngi U Blei bad kumjuh ha ka lah sngi U Blei.
Watla ka jingiaid lynti ki rangiakura ka Jylla ka la poi sha kaba kut, pynban ki dangdon bun ki khlur iakura jong ka ri ki ban dangiai bteng ha kane ka lympung na ka bynta ban iaknieh ban khur ia ka jingjop.
Kane ka lympung ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka jingiatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla, ha SAI Indoor Hall.
Ki la don haduh 104 tylli ki bout ha kaba ki rangiakura ki la pynkhreh ia lade na ka bynta ki jingiakhun bad kumjuh ki nongkitkam ka BFI, ha ryngkat ka jingtrei shitom ki dkhot nongkitkam ka MBA, kumjuh ka tnat Sports and Youth Affairs lem bad kiba bun ki volunteer kiba la don bynta ban pyniaid beit ia kane ka lympung iakura.
U lahduh ha ka Asian Games 2018 u Amit Panghal na ka Services u la khur jingjop ha ka flyweight 48-51kg fight pyrshah ia u Jayshandeep Singh na ka Punjab. Hapdeng kane ka jingiakhun u Panghal um da hun mynsiem halor kane ka rukom ialehkai ka jong u.
Hadien, u rangiakura na Assam u Shiva Thapa, uba la khur ia ka takma ksiar ha ka aiom ba la lah, u la iakhun pyrshah ia u Santhosh HK uba na Karnataka ha ka light welterweight 60-63.5kg. Kumba long hynnin ka sngi, u Thapa u la lah biang ban khur ia ka jingjop lyngba ka jingiarai lang da baroh ki nongbishar.
Haba phai sha ki ar ngut ki nongiakura ka Jylla ki la pyrshang ban ialehkai bha da ka jingkhmih lynti ban iai bteng ia ka jingjop, hynrei ha kaba kut ki la mad ia ka jingshah rem.
U Synnah, ha kajuh ka ka kyrdan iakura jong ka light welterweight kumba long u Thapa, u la iakynduh pyrshah ia u Harsh Vardhan Joshi uba na Uttarakhand. U Synnah bad u rangiakura ka liang pyrshah, ki la iakhun tyngeh haduh ka wat kaba lai, hynrei ha kaba kut u Joshi u la lah ban tam point ia utei u rangiakura ka Jylla.
Haba phai sha u Bhalang Shadap, ha ka welterweight 63.5-67kg, u la iakhun pyrshah ia u Parlad Singh uba na Punjab, uba don ia ka rynieng kaba jrong ban ia utei u rangiakura ka Jylla. Watla katta u Shadap u la ioh ia ki kabu kiba biang, hynrei ha kaba kut u Parlad u la khur ia ka jingjop lyngba ka jinglah ban kamai bun point.
