Shillong, Jymmang 13: Ka Khasi Hills Autonomous District Council (KHADC) mynta ka sngi ka 13 tarik u Jymmang 2024 ka la ioh ban khot ia ka jingialang ba la pyniaid da u bah Pynshngain N Syiem u ba dei u Deputy CEM ka KHADC ha ryng kat ka jingiadon u Nongialam ka laingiatei u bah Titosstarwell Chyne ki MDC.
Ki Nongialam ka Synjuk ki Rangbah Kur, ka Synjuk ki Khlieh Nongsynshar Shnong ka Bri u Hynniewtrep bad ki ophisar jong ka Council ha kane ka jingialang ki la shim ia ka rai ha ka ban pynkhreh ia ka thup jongki Kur ka ba don ha baroh ka Bri u Hynniewtrep ki ba don hapoh u pud u sam jong ka Council.
Ha ba ioh ban ia kren bad ki nongthoh khubor na ka liang u bah Pynshngain N Syiem u la ong ba kane ka jingialang mynta ka sngi ka long ban buh ryntieh ia ki kur ki jaid khnang ba kan ym long ka ba dkhot bad kumjuh ruh ha ka ba iadei bad ka Scheduled Tribe.
U bah Syeim u la ong ruh ba ha kane ka jingialng la shim ruh ia ka rai ba na ka liang ka Council ka dei ban don ia ka thup jong ki kur ki jaid ki ba dei ha poh u pud u sam jong ka council khnang ba ka jingaijaid bad ai ia ki syrnot kin long ki ba bniah bad kumjuh ruh ba kin ym don kano kano ka jingia tyngkhuh badno badno.
U bah Syiem u la ong ruh ba shen ha kine ki sngi na ka liang ka council kan sa phah ia ka jingtip sha ba roh ki kur ba kin phah ia ka jingtip jong ki sha ka council khnang ba ka council kan ioh ban leh ia ka ba don kam. U la ong ruh ba ha dein kane ka jinglumthup na ka liang ka council kan sa ioh ban pynmih paidbah khnang ba baroh ki kur kin don ha ka kane ka thup.
U Titosstrawell Chyne u la ong ruh ba na ka liang jong u, u la pynpaw ba kane baroh ka la wan hadien ba na ka liang u DC ka Ribhoi u la pan ia ka thup jong ki kur ki ba hap hapoh ka KHADC.
U la ong ruh ba na ka linag jong baroh ki khlieh nongsynshar ki pdiang ia ka Khasi lineage Act 1997 bad u la ongruh ba ki la pdiang ia ka jingpynmih ia ka hukum ba la pynmih da ka sorkar ba la pynmih da ka tnad Social Welfare.
