Shillong, Iaiong 30: Ka Khasi Students’ Union War Jaintia Circle ha ka ka jingialam u President Samla Laitphar Syngkrem bad General Secretary Samla Lurman B. Talang bad ki katto katne ki dkhot ka la leit ban ai jingiarap ia kito kiba shong home quarantine hapoh War Jaintia.
Ka seng hadien ba ka la ioh khubor ba kine kiba shong home quarantine ki shem shitom ban ioh ki marbam, ka seng ha ka bor iba rit ka la leit ban ai jingiarap sha kine kiba hap ban shong ha iing bad la aiti beit ha ki Rangbah Shnong ban pynpoi sha ki ba don ha ki iing.
Ki shnong kiba ka seng ka lah leit sam ki long ka Pdengshakap, Amjalong, Jong U Shen, Amsohtai, Mupyut, Amladkhur, Khonglah bad Ammutong kiba la ioh jingtip na ki Doctor jong baroh ki PHC, CHC bad Dispensary kiba don hapoh ka thain.
Ka Seng ka ai khublei ia baroh kito kiba shong home quarantine bad ka dei ka jingialeh shitom jong ki ban tehlakam bad ban mih shakhmat ban ym saphriang une u khniang jingpang, kyrmen skhem ba phin lait kloi na kane ka jingialeh bad ka ai khublei ruh khamtam ia baroh ki Doctor kiba la ialeh shitom ban pynshai ia ki paidbah bad lum jingkhein ia kito kiba wan na Bethany Hospital.
Ka seng ka kyntu ruh sha baroh ki paid nongshong shnong ka War Jaintia ba kin sngewbha ban long adkar ha kum kane ka por bad ban iatreilang bad ki bor sorkar khnang ba kan long kaba jop bad lait na une u khniang jingpang Covid 19. Kane ka long katkum ka kyrwoh na u General Secretary Samla Lurman B. Talang.
