Shillong, Nailar 22: Ka jingiathep but ha ka eleshon MLA shiteng samoi, ha 51-South Tura bad hapoh jong ka 35-Ranikor Konstitwensi kan long la shai ka sngi, ha kaba ki paidbah nongthep but jong kitei ki ar tylli ki konstitwensi kin ai ia ka rai ka jong iano ban phah sha ka iing dorbar thawain ka jylla kum ki nongmih khmat jong ki.
Mynta ka sngi baroh ki polling ophisar kila mih na na ki jaka ban leit sha ki polling station na ka bynta ka elekshon ka ban long la shai ka sngi. Ka Ranikor konstitwensi ka don 65 tylli ki polling station bad ki paidbah nongthep vote ki don 29,685 ngut. Ka South Tura ka don 36 tylli ki polling Station bad ki paidbah nongthep vote ki don 30,231 ngut.
Ha kane ka elekshon shiteng samoi baroh ar tylli ki konstitwensi ki don mar saw ngut ki kyrtong, ha South Tura ki long u Conrad K Sangma jong ka NPP, ka Charlotte W Momin jong ka Congress bad ar ngut ki dkhot shimet, u John Leslee K Sangma bad u Chris Kabul A Sangma. Katba ha Ranikor ki long u Martin M Danggo jong ka NPP, u Jackiush Sangma jong ka seng Congress, u Bah Pius Marwein UDP bad u Bah PN Syiem PDF.
