Shillong Rymphang 14: U Nongwad jingtip paidbah u bah Disparsing Rani, u la ong ba ka jingkam jong u Myntri Rangbah ka jylla u Conrad Sangma ba ka NPP ka ladep biang lut ia ki kot ki sla haba iadei bad ka jingtei ia ka ophis jong ka NPP.
U bah Disparsing haba kren sha ki lad pathai khubor, u la ong ba katkum ka RTI ba u la ioh lum na ka MUDA bad katkum ka Detailed Project Report (DPR) la pyni ba ym shym la don ka NOC ban pynshisha ba la ioh jingbit na ophis jong DC ban tei ia ka ophis NPP.
La ong ba ha ka soskular ba la iasoi bad ka DC ophis, la kdew shai ba ha shwa ban tei ia kano kano ka jingtei ha ki jaka, kidei ban ioh jingbit na DC ophis bad la kdew shai ba ki nongshim jaka kim lah ban shna ia kano kano ka jingtei khlem da ioh jingbit na DC ophis. Hynrei ka jingkam u Conrad ba ki kot ki sla ki biang lut bad ym shym la ioh ia ka jingbthah na ka tnad, ka long ka kaba snegwsih namar ba kat u Myntri Rangbah um tip.
“Kane ka jingkam u Conrad ka paw ba um pat tip ia ka jingmut jong ka Detailed Project Report (DPR) namar ba ha ka DPR ruh la kren shai ba kino kino kiba ioh bynta ha kano kano ka jaka lyngba ka jingiasoi soskular ne ka jingthied kidei ban pynbiang ia ki kot ki sla,” u la ong. ” Haba peit ia ki kot ki sla , kam don ka NOC ba la ai jingbit da ka ophis DC,” ong u bah Disparsing.
Haba iadei bad ka jingkynthoh u bah Prestone Tynsong ‘Uei uta u Disparsing balei um wan iakynduh ianga halor ka jingpylut T.43 klur bad Balei ym pan na ka sorkar jylla’, u bah Disparsing u la ong “Ngam dei u briew ba biej kum maphi bah Prestone, nga dei u Activist bad nga kren ia ka jingshisha bad ka jingwad bniah.”
“Nga la pan RTI na ophis jong ka tnad ka koit ka khiah bad haba pan jingtip halor ka jinglut jingsep ba la ai da ka sorkar pdeng na bynta ka khlam CoVID-19. Hynrei kaba sngewsih ka long ba ym shym la ioh ia ka jubab,” ong u Disparsing bad bynrap, ” Haba phim ai, da ka jingstad jong nga , nga la ioh jingtip noh na Delhi.”
Haba nga wad bniah na Delhi, nga ioh jingtip ba ka sorkar pdeng ka la phah T.119 klur ka bai lut bai sep ha ka CoVID hynrei katba ka sorkar jylla ka ong ba ka lut T.76 klur.
