Shillong, Jylliew 16: Ka jingneh u slap, ka eriong bad pyrthad mynta la shi taiew tam ka la wanrah ka jingjulor ha kylleng ka Meghalaya, ka tnat India Meteorological Department (IMD) ka la pynmih da ka jingpyntip shaka sorkar jylla ban long kiba husiar namar kane ka jingsdang kyllang ka suin bneng ka lah ban wanrah shuh shuh ia ka jingther u lap bah bad ka eriong.
Kane ka tnad watbniah ka la iathuh haduh mynta ki paidbah kiba la shah ktah na ka jingther u lapbah, eriong bad pyrkhat ki kynthup, uwei ba khlad, bad 2,777 ngut kiba la shah ktah na baroh ki district ka jylla Meghalaya, 79 tylli ki shnong kila shah ktah, ki ïing ba la shah pynjulor ki long 186 tylli bad 3 tylli ki mrad kila khlad.
Hadien ka jingphah jingtip na ka tnat IMD, ka executive director ka tnat State Disaster Management Authority (SDMA) ka kong Matsiewdor War (IAS) ka la lum kyrkieh ka jingialang na ka bynta ban pynkhreh iaki lad jingiada lada wan syllad kynsan ka eriong bad u lap bah ha kylleng ka jylla.
Haba kren sha ki lad pathai khubor ka kong Matsiewdor War ka la iathuh ba ka tnat ka la lum jingkhein haba iadei bad ki jingshah lynshop ka mei mariang naduh ka 1 tarik haduh 16 tarik Jylliew bad haduh mynta la ioh jingtip ba ki don haduh 2,777 ngut ki nong shong shnong ka Meghalaya kiba la shah ktah namar ka jingsdang ther u lapbah bad eriong hapoh ka jylla.
Katkum ka jingiathuh na ka IMD baroh ki district hapoh ka jylla ki dang don hapdeng ka jingma bad naka liang ka tnat ka la bthah ia ki bor district ban long kiba peitngor, la bthah ruh ban shim iaki sienjam katkum ki jingdonkam ban iada na ka jingshah syllad ka mei mariang
Ka kong Matsiewdor War ka la iathuh ruh ba na ka liang ka tnat SDMA ka la phah jingtip ruh sha ki paidbah lyngba ki Mobile Phone, kumno ban leh lada wan jingkylla ha ka suinbneng bad kumno ban shim ki lad jingiada, ha kiba kum kita ki khep.
Ka la iathuh ruh ba na ka liang ka IMD haka 15 tarik mynta u bnai ka la phah jingtip ban peitngor ia ki 3 tylli ki district kata ka East Khasi Hills, West Khasi Hills bad Jaintia Hills namar ka lah ban wanrah ka jingma namar ka jingkylla ka suinbneng.
Nalor kane ka kong Matsiewdor war ka la iathuh ba ka jingjur ka jingtwa khyndew ka dei ha ki thain East Jaintia Hills, East Khasi Hills bad ha South West Khasi Hills.
Kane ka dei hi namar ka jingjur slap hynrei haduh mynta ka jinglong jingman hapoh ka jylla ka long kaba shngaiñ hynrei watla katta ruh, ka tnat ka kyntu ia ki paidbah ban long kiba peitngor namar ka jylla ka la sdang sakhi iaka jingjur slap ha kine ki khyndiat sngi.
