Sohra, Nohprah 21: Katba nang iaid ki sngi ki por; ka jingbymiohkam khamtam hapdeng ki samla ba la nang la stad kala nangkiew, kumba long mynta ki don bun bha ki samla bala nang la stad hynrei ki bym iohkam pat. Hadien ba ka seng kala iohi ia kane jingkyrduh kam khamtam hapdeng ki samla ba la nang la stad; ka seng Tynrai Foundation kaba treikam hapoh u pud u sam jong ki thain Sohra-rim kala pynlong iaka workshop halor ka phang ki samla bad ka rep ka riang ia kaba la bei pisa daka Nehru Yuwa Kendra, Shillong. Kane lehse ka dei ka sien kaba nyngkong bad ki samla ki sdang ban iakren iaki lad iohkam lyngba ka rep ka riang.
Ha ka jingai jinghikai ba la ia synrop lang da ki nongmihkhmat ka North East Slow Food and Agrobiodiversity Society (NESFAS), Ka Rice Socio Development Guild, ka A Ray of Hope Foundation bad kumjuh ruh ka Rympei Jingtip Development Society. Ha kane ka jingiaphylliew jingmut la ioh ka jingkren na ki arngut ki nongai jingmut kiba kynthup ia u H.H. Mohrmen na ka Society for Urban and Rural Empowerment (SURE) bad kumjuh ruh u Pius Rani na ka NESFAS.
Haka jingkren jong u; u Mohrmen ula pynkynmaw ia ki samla kiba ia don lang ba ki kam sorkar kila duna bad ka jylla jong ngi kam lah ban shah ia ki kharkhana ba lah ban aikam aijam ia ki samla bala nang la stad, kumta ka lad ban iohkam iohjam ia ki samla ka dei tang da kaba phaidien sha ka rep ka riang.
Ki samla kiba la nang la stad ki lah ban nang pybha ia ka rukom rep tynrai da kaba pyndonkam iaka jingnang jingstad kaba kila ioh na ki skul bad skulbah kiba ki pule la ong u Mohrmen. Kumjuuh ruh ula ai jingmut ba ki samla ki sdang pyrhat kumno ban pynmih ne ban pynkylla mardie ia ki mar rep kiba ki pynmih da kaba leh value addition ia ki mar rep jong ki, kane ka lah ban ai kam ia ki samla bad kumjuh ruh ban aikam kylla ia kiwei pat ruh.
Shuh la pynkynmaw bad baroh ki marbam kiba ngi pyndonkam ha ka jylla ki dei kiba wan na bar, naduh ka dohkha, ka pylleng, ka dohmasai bad wat ka doh sniang ruh, kumta ula pynkynmaw bad kine ki dei ki kam kiba ki samla ki lah ban leh ban pyniohkam ialade bad aikam ia kiwei pat ruh kumjuh bad ka iew kala don lypa.
Naka liang jong u Pius Rani ula ai jingmut ia ki samla ba lada ki mut ban sdang ia kano kano ka kam kim dei ban leh kynsan kynsan ia kano kano ka kam, hynrei ba ki dei ban da wad bad bishar bniah bha ia kam kaba ki thmu ban leh bad ba kim dei ban kyrkieh hynrei ban sdang na iba rit shuwa. La ia kren ruh shaphang ki ram mynta kiba ka sorkar ka pynslur kum ka Kisan Credit Card (KCC) ia ki nongrep, ka Mudra loan, ka standup bad startup India kiba ki samla ki lah ban shim kabu lada ki kwah shisha ban sdang ia kano kano ka kam.
Ki samla na ki shnong kum na Sohrarim, Nongtraw, Diengsong, Ladmawphlang, Dewlieh bad Mawjrong kila wan ban iashim bynta ha kane ka jingiaphylliew jingmut. La pyniaid ia ka jingialang da u Shaiphar Dohling bad la ioh ruh ia ki jingkren na u Horno Dohling, u Kaisar Dohling, u J.P. Singh naka NESFAS bad kiwei kiwei.
Ki samla kiba la ia donlang ha kane ka jingialang kila sngewiahap ia ka sur kaba mih na kane ka jingialang bad kila rai ban sdang pyrkhat noh ban peitbniah ia ki kam lyngba ka rep ka riang. La rai ruh ban nangbuddien ia kane ka kam ha kaba kine ki seng khamtam ka Tynrai Foundatio bad ka NESFAS kin buddien ia ki rai kiba mih na kane ka jingaijinghikai.
