Shillong, Lber 09: Ki shipai BSF jong ka Ri India ha ka jingialang kaba la long bad ka kynhun shipai na Bangladesh kiba ap ia u pud u sam ia kaba la tip kum ka Border Guard Bangladesh kaba la long ha Shillong, na ka liang jong ki BSF kila ong ba ki dei ban sangeh noh ia ka jingshallan ban pynrung ia ka pisa thok sha India na Bangladesh.
Ha kane ka jingialang ia ka kynhun na Bangladesh ka BGB la lam khmat da u Brig Gen Habibul Karim, ndc, psc, Region Commander North East Region, la synran lang da u Brig Gen Syed Ahmed Ali, Region Commander, South East Region bad Sector commanders jong ka Sylhet, Rangamati, Comilla, Khagrachari, Mymensingh, Guimara, Srimongal, Bandarban, ha kane ka jingialang la wanlang ruh ki briew na ka tand kam poh iing jong ka thie ka Ri.
Na ka liang jong ki BSF la lam khmat da u Sudhir Kumar Srivastava, IG, BSF Guwahati, u Anil Kumar, IPS, IG, BSF Meghalaya, u B N Sharma, IG , BSF, Tripura bad kiwei kiwei ki heh shipai na kane ka thain, ha kane ka jingialang la don lang ruh ki heh jong ki BSF na Delhi bad na ka tand kam poh iing jong ka Ri India.
Kane ka jignialang hapdeng kine ki ar tylli ki ri kaba ka jingiadei paralok ka jan bha la pynlong ha Umpling, Shillong. Kane ka jignialang ka long ban wanrah ia ka jingiajan shuh shuh hapdeng kine ki ar tylli ki ri ha kiba bun ki liang.
Ha kane ka jingialang ka jingiakren kaba kongsan eh ka long ba kumno ban iada ha khappud hapdeng kine ki ar tylli ki Ri na ka bynta ban wanrah ia ka jingiashong suk ha khappud.
Na ka liang jong ki BSF kila ban jur ha kane ka jingialang ba ki BGB ki dei ban phikir bad teh la kam ia ka jingwan ki briew jong ki sha India ban wan leh ia ki kam runar hau pud u sam jong ka Ri India.
Ka jingwanrung tuh jong ki briew ka thie ka ri sha India, ban iada na ka jingwan ki pisa thok sha kane ka ri bad ka jingwanb an pom ia ki khlaw na kane ka Ri bad kim dei ban pynthud lada ka India ka pyntrei ia kino kino ki kam pynroi ha ki bynta jogn ka Ri India. Halor kine ki jingkynnoh na ka liang jong ki BSF kila pynbut sa ki sabut ban pynshisha ia ki jingkam jong ki.
Katba na kaliang jong ka BGB kala kyntu ia ki BSF ba ki dei ban pynsangeh shisyndon ia ka jingsiat pathar ia ki riew paidbah jong ka Bangladesh kiba rung tuh sha India. Halor kane ka jingong ki BSF kila ong ba ia kane ka jingsiat la leh da ki riew paidbah namar ki wan rung ha ka por shiteng synia.
Ki BGB kim dei ban pynshlur ia ki briew jong ki ba kin wan rung sha India ba ioh ia ka jingiaka jia hapdeng ki paidbah, lada kim wan rung ka jingiakynad kan lait.
Na ka laing jong ki Border Guard Bangladesh kila ban jur ba ka India ka dei ban pynshitom tyngeh ia kito kiba shallam ia ki mar dih poynbuaid sha Bangfladesh na kane ka Ri.(SP News)
