Shillong, Naiwieng 06: Kadei ha u snem 2019, ba ka sorkar Meghalaya ka la pyntrei kam ia ka buit thymmai ban bud dien ia ka koit ka khiah bad ka rukom sumar ia ki long kmie ba armet khnang ban pyntikna ba kin kha suk ia ki khun jong ki, ha kylleng ki bynta jong ka jylla.
Katei ka MOTHER App, kaba dei ka kynja buit treikam kaba lum jingtip shaphang ki long kmie armet ka la lah ban pynkoh nguh bun bha ki long kmie ba kin leit ban kha ha ki jaka sumar bad kane ka la iarap haduh katta katta ban pynduna ia ka jingdon ki long kmie ba iap por kha khun ne kata ka Maternal Mortality Rate (MMR).
Ka jinglah jong kane ka app ban treikam kadei da ka jingai jingtip kaba biang bad kaba tikna na ki nongtrei ka tnad ka Koit ka Khiah lyngba ki ANM sha ki Doktor bad sha ki heh ka koit ka khiah ha ki distrik bad ruh ha ki bor bapeit ha ka jylla kiba ka kam jong ki ka long pat ban bud dien ia kito ki long kmie armet na ka por sha ka por namar ka paw hi bad kdew hi ha katei ka Mother App.
“Mynshwa, ka jingbud dien ia ka koit ka khiah jong ki long kmie armet ka dei kaba shitom bad jynjar bha namar ka jingbym don ia ki jingtip kiba biang bad teng teng kaba ngi don ruh kadei ka bym da biang namar la shulum bad thoh ha ki kot lane register,”ong u Ramkumar S, IAS, Additional Secretary ka tnad ka Koit ka Khiah ka sorkar jylla.
Ha kaba sdang, iakatei ka kam la pyntrei kam nyngkong eh ha South West Garo Hills bad lyngba katei ka app la lap ba ka la kyntiew na ka 44 persen sha ka 76 persen ki long kmie ba armet kiba leit ban khakhun ha ki jaka sumar kata ruh tang ha ki 6 bnai. Bad dei na ka jingseisoh ka rukom treikam ba hadien la pyntre kam ha baroh kawei ka jylla.
Da kaba pyndon kam ia ka Mother App ha ki phone jong ki, ki ANM ki lah ban lum lut ia ki jingtipshaphang ki long kmie armet kynthup naduh ka rta, ka jingma kaba ki lah ban don, ka Tarik ba ki lah ban kha, ka jingleit ai tika bad ruh mynno ki leit ban phah peit nangtaruh ka jaka sah bad kiwei kiwei ki jingtip.
Ia kitei ki jingtip la buhruh ha ka dash board jong katei ka app khnang ba ki Doktor bad ki nongtrei ka koit ka khiahruh ki lah ban bud dien lang kham tam ia kito ki long kmie ba don jingma bad kiba lajan kha.
U Dr.Tyngshain Sutnga, Medical Officer jong ka Bhoirymbong CHC, u jupeit man ka por ia ka dash board jong ka MOTHER ha ka shisngi ban bud dien ia ka jingdon ki long kmie armet.
Da kaba leh kumtei u lah ban tip pat katno ngut ki long kmie armet kiba don jingma ha ka jaka ba u dei peit khnang ba un lah pat ban pynkynmaw ia ki ba kin wan tista ban phah peit ba kin lah pat ban kha suk ia ki khunjong ki.
U ong ruh ba ka MOTHER App dangshen ka la pyllait im ia kawei ka long kmie kaba la don jingma kaba la kyntait ban leit kha ha jaka sumar ia I khun. La ong ba ia katei ka jingjia la shimlypa baka dei ka high-risk pregnancy lane ka jingpun khun kaba don jingma hadien bala iohia ki jingtip ba la ai da ki ANM.
La iathuh ba mardor ka la kren bad pynsngewthuh ia katei ka long kmie ba don jingmalai sngi shwa ba kadei ban kha ia I khunlung bad phah ruh ia ka ASHA ban leit kynduh ia ka.
Katei ka long kmie ka la kha shisngi hadien ka por ba la buh bad ka jaboh ka la sahkut shapoh. Hynrei kiba haing khlem pynslem ki la pyntip sha ka ASHA kaba leit ban peit mardor ia ka bad pyntip ruh sha ka CHC bad mardor la phah ia ka ambulance ban leit shaw na iingsah bad pynkit pat sha Hospital ha ka por kaba biang bad kumta ka la lait im. Kane kadei tang ka nuksa ba kumno kane ka app ka lah ban iada bad pyllait ia ka jingim jong ki long kmie, ong u Dr. Sutnga.
Ki jingtip kiba lumlyng ba ka MOTHER App, kadei kaba lahruh ban peit paidbah ha ka dashboard lyngba ka website www.meghealth.in. Kane ka data ka iarapruh ban peit bad buddien wat ia ka koit ka khiah jong ki long kmie armet kaba dei ka daw bah kaba ka jylla mynta ka la duna ki long kmie ba iap por kha khun.
Kane MOTHER App ka pynishai kdar sha ka pyrthei ba ka long shisha ka jingkyrkhu ia ka jylla Meghalaya. Da kane ka sienjam ka sorkar ka la lahruh ban wanrah bun ki polisi bad pyntrei kam ruh ia ki kum ka Chief Minister Safe Motherhood Scheme kaba dei da ka thong ban pynduna ia ka jingiap ki long kmie armet (Maternal Mortality Rate) ha ka jylla.
Ia mynta hi, kane ka app ka iarap borbah ia ka sorkar Meghalaya ban pyntrei kam ia katei ka skhim kaba kongsantam ka Measurable Outcomes in Transforming Health Sector through a Holistic Approach focusing on Women Empowe Rment (MOTHER).
