Shillong, Naiwieng 20: Namar ka jinglong kyndong jong ka jingkieng Umsherpi barim kala pynlong ia ki briew ban shim ia ka kabu ban leit ban theh khyndew ha katei ka jaka kaba la tuid sha poh ka wah Umsherpi.
Hapoh ka tnad khlaw jong ka jylla Meghalaya ka don ka kommittee ka ban peit ban iada ia ki um kiwah ha kane ka jylla Meghalaya bad ka wah Umsherpi ka dei kawei na kiwah kiba la don kam ia ka jingpynkhuid bad pynneh pynsah.
Ha baroh shilynter jong ki wah la khang pyrshah ban theh khyndew ym tang ha katei ka wah hynrei ha kiwei kiwei ruh ki wah, hynrei ha katei ka jaka ba don ka jingkieng nar ba rim Umsherpi kala don ka jingtheh khyndew na ki briew kiba ym lah ban tip.
Haba u SP News Agency u la poi sha kane ka jaka la iohi ba ka jingtheh khyndew na jrong surok bad la pynhap ia ka khyndew sha wah bad da poi ka por slap ka um ka rong noh ia ka khyndew kaba la lang ha rud wah.
Ka tnad khlaw kaba don ia ka kommittee ban peit kyrpang ia ka jingiada ia ki wah kala dei ban buh ia ki jingthoh sha ki jan wan ban bthah ia ki briew ban nym theh khyndew sha wah.
