Shillong, Nailur 25: U bah Sanbor Shullai MLA jong ka 19-Shillong South u la wan peit da lade ia ka jaka ba twa khyndew mynta ka sngi Lower Lumparing, Parmaw, Dhobi Ghat namar ka dang hap hapoh ka konstitwensi ka jong u.
Haba kren ha ki lat Pathai khubor ha kane ka jaka u la ong ba ia kito kiba lait na kane ka jingmynsaw yn pynsah noh shipor hapoh iing dorbar ha Kenche’s Trace ha kaba u la pynbiang ia ki jingdon kam duh ka bam bad ki jain kup.
Haba ia dei bad kane ka jingjia un ia kren bad u myntri rangbah ka jylla u Conrad K Sangma ban ai jingiarap ia kine ki iing kiba la ngat ha kane ka jingjia kaba sngewsih bad un ia kren ruh bad ka Deputy Commissioner ban iarap ia kine kiba mat ia kane ka jingjia ba sngewsih.
La iathuh ba ha kane ka juh ka jaka kala don teng ka jingtwa ha u snem 2010 bad naduh katei ka por la ia kren ba dei ban pynkynriah noh ia kine kiba sah ha kane ka jaka namar ka imat, hynrei kim shym la kynriah.
La ong ba na ka liang jong u kum MLA ka shnong kin sa ai ka jingthoh ha kaba ai dei bad kane khnang ba kan nym don ka jingsngewsih ha dien ha bud, la ong ba un ia kren ruh bad ki trai jaka ba kin pynkynriah ia kine kiba dang sah.
Kiba la ioh ban sei ia ka met jong ki long u Imdad Nongrum 60 snem, ka Saira Ahmed 45 snem, ka Feroza Khan 40 snem kiba dang jah mynta ki long u Uddin Ahmed 35 snem bad ka Razia Ahmed 35 snem.
