Shillong, Risaw 15: U bah Wailadmiki Shylla Lamphang jong ka Mawmluh Cherra Cement Limited (MCCL) u la ong ba ki dang ia kren mynta bad ka hima Mawmluh bad hima Sohra ha kaba ia dei bad ka karkhana dewbilat jong ka sorkar kaba don ha katei ka jaka.
Kane ka jingiakren bad kitei ki hima ka long ba ka sorkar ka don jingthmu ban ia treilang bad ki kompeni shimet ha kaba ia dei bad ka jingpyniaid ia kane ka karkhna namar ka sorkar kam lah shuh ban dei pisa ia ka MCCL. Ka par Mawshun ka hap ha hima Mawlmuh bad ka Karkhana ka hap ha hima Sohra.
La ong ha dien ba la ioh ia ka jingiamynjurlang ka sorkar kan sa buh ia ki kyndon ban iada ia ki nongtrei bad kan don ka jingpyrkhat kyrpang ia ki trai shnong, ha kane ka jingiatreilang bad ki kompeni shimet lada ioh ia ka jingbit ka sorkar kan don ka bynta ba kano kano ka kompnei ka ban wan bei pisa kan nym lah ban shim ia ka rai katba mon.
Kumba ka long ka MCCL ka dei ka karkhana dewbilat kaba la tip kum ka Wet Process hynrei mynta la pynkylla sha ka Dry Process, ki daw jong ka jingtlot jong katei ka karkhana ki don bun ki daw ia kaba ym lah ban kynnoh tang shiliang hynrei na baroh ar liang hap ban shim lang ia ka jingkitkhlieh.
Kumba ka long mynta ka MCCL ka kitram sha ka sorkar haduh T.324 klur, tang ia bai dewiong bad kiwei kiwei ki jingsiew kiba kynthup ia ka tulop jong ki nongtrei ka pisa kaba dang dei ban siew kala long T.52.64 klur kaba ka MCCL ka dang hap ban siew sha ki nongtrei.
La iathuh ba baroh ki nongtrei hapoh ka MCCL ki don haduh 454 ngut, na kine 126 ngut kila pan ban shong thiat noh bad ki nongtrei kiba dang sah ki long 312 ngut bad ki 16 ki nongtrei ki bym hap ha ka jingsiew katkum ka wage board.
