Shillong, Jymmang, 1: Ka long ka jingsngew sarong ia ka jylla Meghalaya ha kaba kawei ka long kmie ka kong Sabina Parvez Warjri ka la jop ia ka jingiakop thei bha briew Mrs Universal 2017 kaba la long dangshen ha nongbah Delhi .
Haba kren ha ki nongthoh khubor mynta ka sngi ha Shillong Press Club ka la ong ba “Ngi ki khasi ngim don jingduna ei ei ruh em ban ia nujor lane ban iathew tarajur bad kiwei pat ki jaidbynriew , hynrei kaba don kam ia ngi dei ka jingkyrshan na baroh ki liang”.
Da kane ka jingjop ka la plie ka lad ba ka kong Sabina kan sa mihkhmat ia ka Ri India sha ka jingiakop Mrs International kaban long ha Ri Bilat hapoh ka nongbah London ka ban sdang naduh ka 3tarik Nailur bad kan kut ha ka 10 tarik u juh u bnai .
Kane kan long ka sien banyngkong napdeng ki kynthei khasi ban ioh ia kane ka lad ban mihkhmat ia ka Ri ha ka jingiakop ha ki rynsan jong ka pyrthei . Ka kong Sabina ka la ong ba ka donkam shibun ka jingpynbit pynbiang ban ia shim bynta ha katei ka rynsan ha kaba kin don kumba 40 tylli ki ri ki ban iashim bynta .
Kane ka longkmie ka la pynsngew ba ka sorkar jylla lada ka don ka lad ka lynti ban iarap namarba ka don shibun ki jinglut ha kum kine ki jingiakop . Kum ka longkmie haba ka ioh ia kane ka lad ban mihkhmat ia ka ri , ka long ruh ka burom ia ka jylla hi baroh kawei . Kum ban shu pynkynmaw ba ka kong Sabina ka dei ka Miss Shillong 1995 .
