Shillong, Nailur 02: U nongmih khmat ba kyrpang jong ka AICC u Mukul Wasnik mynta ka sngi la pyndep ia ka jingiakynduh ia baroh ki MLA ki MDC bad ki nongkit kam jong ka seng Congress ha kane ka jylla Meghalaya bad mynta u la sngewthuh ha ei ka party ka don ha kane ka jylla Meghalay ha kaba ka election sha ka iing dorbar thawain ka jylla ka sah mynta sa shisnem tam.
Ha dien ka jingiakynduh ia ki nongkit kam jong ka party, u ne u nongialam jong ka seng Congress ym shym la khot ia kano kano ka jingkren sha ki lai pathai khubor hynrei na ka liang jong ki nongthoh khubor kila buh ia ki jingkylli ha phyllaw jong ka Congress Bhavan, ha kaba u la ong ba u la dep ban ia kynduh ia ki nongialam jong ka seng baroh bad kaei kaba don kam ka long ban pynkhlain ia ka party.
Halor ka jingdawa ban bujli nongialam u la ong ba kam don kum kata, u la ong ba nangne sha khmat kin pynkhlain ia ka party bad ka party congress kan wan biang sha ka jingjaop da ka jingiatrei lang baroh. U ne u nongialam jong ka AICC kaba la phah kyrpang ban wan ia kynduh ia ki nongialam ka seng Congress ym shym la ong ei ei ha kaba ia dei bad ka jingkwah jong ki MLA ban bujli nongialam.
