Shillong, Nailar 12: Palat 30 ngut ki briew, ha ryngkat kiba haiing jong ki, na Meghalaya kin iashim bynta kum ki nongshah khot sngewbha ha ka jingrakhe ia ka lyngkhuh Sngi Ioh Jinglaitluid kaba 78 ha New Delhi ha ka 15 tarik u Nailar, 2024.
Ka Sorkar India ka la khot sngewbha ia 6,000 ngut ki briew na kylleng ka ri ban iashim bynta ha kane ka jingrakhe hapoh ka phang Viksit Bharat. Ha ryngkat kine ki nongshah khot sngewbha, ki don 30 ngut ki briew na Meghalaya kiba wan na ka jinglong jingman bapher bapher, ba kynthuplang ruh ia ki longkmie, ki samla bad ki nongmihkhmat na ka NITI Aayog bad Panchayat Raj.
Ki briew ba la shah khot sngewbha ki la ai ka jingsngewnguh bad ki la kren katto katne shuwa kane ka jingrakhe jong ka ri.
Ka Kong Brotibon Mukhim, nongtrei ASHA, ka la pynpaw ia ka jingsngewnguh da kaba ong, “Nga sngewnguh shisha ia ka Sorkar kaba la jied ia nga ban iashim bynta ha ka jingrakhe ia ka lyngkhuh Sngi Ioh Jinglaitluid. Ka khubor jong nga ka long kaba suk ban sngewthuh: Long kiba trei shitom ha ka kam ba phi trei, long kiba skhem jingmut bad kiba iaishah bad burom ia ka kam ba phi trei.”
Kumjuh, ka Kong Balalupa Mawlong na ka tnad Panchayati Raj ka la ong, “Kum ka longkmie bad ka nongshong shnong jong ka India, nga pynshlur ia baroh ban iashim bynta ha kane ka jingrakhe bad burom ia ka Sngi Ioh Jinglaitluid kaba dei ka sngi kaba kyrpang na ka bynta ka ri bad ki briew jong ka kiba la ioh ia ka jinglaitluid na ka jingsynshar ki mynder.
Man u briew jong ka ri u don ka kamram ban rakhe bad burom ia ka ri ba ngi sah. Jai Hind!” Ka la ai khublei ruh ia baroh na ka bynta ka Sngi Ioh Jinglaitluid.
Na ki khynnah, ka Laaibynta Mylliem, kaba pule ha ka Class 5 ha J.S. Memorial LP School ha Laitlyngkot, ka la ong ba ka sngewshongshit ban ioh leit shabar ka jylla da kaba bynrap, “Nga sngew ioh burom bad nga dap da ka jingkmen ban iashim bynta ha ka jingrakhe ia ka Sngi Ioh Jinglaitluid.
Nga ap khmih lynti ban iashim bynta bad nga duwai ba kane ka sngi kan pynkynmaw ia ngi shaphang ka jingieid, ka jingkmen bad ka shongsuk shongsain ba ngi dei ban don na ka bynta baroh ban tei ia ka India kaba kham bha. Jai Hind.”
U Bah Sanky Syih, u Assistant Teacher ha Khliehriat Higher Secondary School, u la ai jingsngewnguh ia ka Prerana Utsav programme namar dei lyngba kane ba u bad ki khynnah pule ka East Jaintia Hills District, ki la ioh ia ka lad ban iashim bynta ha kane ka jingrakhe.
U la ong ba u khmih lynti bha ia kane bad u la ong, “Nga ai jingsngewnguh kyrpang ia ki Principal jong ka Nodal School Jawahar Navodaya Vidyalaya Rymbai bad ka Khliehriat Higher Secondary School kiba la ialam lynti ia ngi.
Ka dei ka bok ia nga bad ki khynnah pule ban ioh iashim bynta ha kane ka jingrakhe kaba don jingmut bha. Nga sngewkmen ban iashim bynta ha kane ka prokram kaba khraw bad nga khmih lynti ban iashim bynta ha ka.”
Ka Kong Merilyn Nongrum, Secretary ka Seng Iakyntiewlang SHG na Umling C&RD Block, ka la kdew sha ka jingkongsan jong kane ka sngi ia ka bad ka shnong jong ka bad ka la ai jingsngewnguh ia ka Sorkar Jylla kaba la jied ia ka ban sakhi ia ka lyngkhuh Sngi Ioh Jinglaitluid kaba 78 ha New Delhi, sha kaba kan poi ha ka sien kaba nyngkong ha ka jingim jong ka.
Ka la ong ba kane ka dei ka kabu ksiar ia ka ban sakhi ia kiei kiei kiba thymmai bad ruh ki jinghikai kiba ka lah ban wanrah biang ban iasam bad ki nongshong shnong.
“Ka jinglaitluid ka dei ka lad ban pyrkhat kylluid jingmut, leh ia kaba ngi kwah, bad don ka jingthrang ban jam shaphrang ha ka jingim. Ka jinglaitluid ka dei ka lad ban leh lut baroh dalade khlem da shaniah ha kiwei bad ka bor ban kyrshan bad ieng ha la ki jong ki kjat,” ka la ong.
“Nga sngew don burom ban long shi bynta ka SHG bad VO ha ka shnong Harlibagan kum ka Secretary jong ka Iakyntiewlang SHG bad ka VO Iasnohktilang. Ka jingdon jong nga ka ai jingkyrmen bad ka plié ka lad ia ki longkmie ha ka shnong ba kin ioh jingtip namar bun na ki kim nang ban thoh ban pule.
Ha kaba iadei bad ka kam, ngi pynlong ia ki jingpynkhuid shnong man ka por, da kaba khot lang ia baroh ki dkhot ka SHG ban iashim bynta. Ngi iarap ruh ia kito kiba don jingshitom ha shnong.
Ngi pynlong jingialang arsien shi taiew ha kaba ngi ialumlang ban iamir jingmut bad ai jingiarap ia ki longkmie kiba shem jingeh. Shuh shuh, ngi la pyntreikam ia ki skhim kum ka jinglum ia ka um slap bad ka jingsdang ia ki kper thung jhur ha ki iing jong ki briew,” ka la ong
Ha ka jingbatai shaphang ka jingieid ri, u Rikimbath S Marak, uba pule ha St Francis De Sales Higher Secondary School ha South Garo Hills u la ong, “Nga sngew donbok bha ban shah jied kum u nongshah khot kyrpang na Meghalaya. Kane ka dei ka kabu kaba wan shisien ha ka jingim bad nga khmih lynti ban iashim bynta da kaba pyni katno nga ieid ia ka ri. Jai Hind.”
Kumjuh, ka Tinamuri Marak na North Garo Hills, Resubelpara na ka NITI Aayog ka la ong, “Ngi long kiba don ia ka hok ban kren bad ban pyniohsngew – ka hok ba ki riewshlur ki la iakhun ban ioh.
To, ngin burom ia ka jinglenlade jong ki bad tyngkai ia ka jinglaitluid ba ngi ioh mynta. Jai Hind.”Ia ki jingkhot ia kine kiba la shah khot kyrpang la phah da ki Tnad Sorkar lyngba ka Tnad Kam Iada Ri.
