Shillong, Nairung 9: U Bah Titos W Chyne, MDC ka Sohra uba dei ruh u CEM ka KHADC u la ong ba ka jingdon ka Police Outpost ha Mawjrong, East Khasi Hills kan pynmyntoi ia ki nongshong ym tang ha katei ka thaiñ hynrei ia ki bynta ka thaiñ Laitlyngkot, Khatarshnong bad Laitkroh lem ryngkat ki jaka ba marjan.
Haba kren ha ki nongthoh khubor hadien ka jingwan iakynduh ia u Bah Lahkmen Rymbui, Myntri ba dei peit ia ka tnad kam pohïing ka Sorkar Jylla ha ka nohphai sngi, u la ong, “Nga wan ban ia kren bad u Myntri halor ka mat kaba ngi la ïakren naduh u snem 2012 ha kaba la ia donlang ki nongialam shnong ka thaiñ Laitkroh, Khatarshnong bad ki thaiñ ba marjan namar la i donkam ia ka Police Outpost ha katei ka jaka”.
Da kaba ong ba ia ka jaka yn dang ia pynbeit namar ka dang dei tang ka jingtyrwa, u la ong, “Lada ka don ka jingpynthikna, ngan ia kren bad ki nongialam shnong ha katei ka thaiñ ban ai jaka. Ka jingiakren ka long kaba don jingkyrmen bad u Myntri u la ai ka jingkular ban shim khia ban pynioh beit bad mynta ka sah sa ka jaka ban ïakren”.
Da kaba ong ba ka don ka Police Station ha Sohra hynrei ka lynter jong ka surok Shillong sha Sohra ka la long kum ka Highway, u la ong, “Ki kali ki la bun bad ka long ka jingeh kaba khraw ia ki nongshong ka thaiñ lada jia ki jingjia aksiden bad hap ap ia ki bor pulit na Sohra bad kane ka thaiñ Umtyngngar kin hap ap ia kiba na Mawngap bad kiba na ka thaiñ Laitlyngkot kin hap ap ia kiba na Pynursla”.
U la ong ba ka thaiñ Khatarshnong ka la kham jngai na Sohra bad ka don ka PHC ha Khrang. “Lada don ki jingjia kiba donkam bad ki bor pulit kan kham suk shibun eh. Bunsien ki hap ap beit ia ki bor pulit na Sohra bad ka la jngai bha”, la ong une u nongmihkhmat.
