Shillong, K.Lyngkot 09: Ha dien ba u Lamphang ka iing dorbar thaw ain ka jylla u bah Metbah Lyngdoh u la ai ia ka jingithuh ia ka All India Trinamul Congress hapoh ka iing dorbar thawain ka jylla kane ka party kala kylla long ka kynhun kaba bun paid na ka liang pyrshah hapoh ka iing dorbar.
Katkum ki khubor kiba la ioh na ka liang jong ka AITC haduh mynta kam pat phah pat ia ka jingthoh sha ka ophis jong u Lamphang ka iing dorbar ia no ba kin thung kum u Chief Whip na ka liang pyrshah hapoh ka iing dorbar thawain ka jylla.
Namar ba kam pat don kano kano ka jingthoh kaba phah na ka liang pyrshah u bah Process Sawkmie ba dei na ka party Congress u dang neh haduh mynta kum u Chief Whip ka liang pyrshah hapoh ka iing dorbar thawain ka jylla ba dei na ka party Congress.
Katkum ki lat khubor kiba ia jan bad ka AITC la sngewthuh ba ha kane ka taiew ban wan kin leit ban ai da ka jignthoh sha u Lamphang ka iing dorbar thawain ka jylla ban thung ia u Chief Whip na ka liang pyrshah hapoh ka iing dorbar.
