Shillong, Lber 16: U Myntri Rangbah ka jylla u Conrad K Sangma haba jubab ia ka “Adjournment Motion” bala wanrah da ki liang pyrshah, kaba la wanrah da ka Miani D Shira bad u bah George B Lyngdoh, u la ong ba kumba ka long mynta kane ka jingsapriang u khniang jingpang COVID-19 kala pynsyier ia ki paidbah jong ka jylla.
Dei halor kane ba ka sorkar kala shim ia ka rai ban khang ia ki skul, ka iing dorbar kala shim ia ka rai ka long ban pynlyngkot ia ka jingiashong dorbar, ka daw ka long ba ka jingpar sted jong u ne u khniang jongpang. Katkum ki jingtip kiba la ioh ka long ba ka jingpar sted ka long haduh 42%.
Ha kine ki taiew kiba la dep ka sorkar kala peit bniah bha, kum ka sorkar ka sngewthuh kumno ban leh, ki don ki bynta kiba hap ban pyntip paidbah bad don ki bynta ban buh khnang ba ki paidbah kin nym shong syier.
Haba ai kren bad ki jingkren jong ki dkhot ka iing dorbar u la ong ba ka sorkar kala shim bun ki lat ki lynti, kita ki long ba ki samla pule kiba la wan na China ki long 74 ngut bad 54 ngut kila pyndep ia kata ka jingsumar da lade ia lade, ka sorkar ka dang peit bniah ia ki.
Ka don ka jingsngewkhia ha kaba ia dei bad ka jingdon ia kilad jingiada, na ka liang jong ka sorkar kala buh ia ki jaka ai jingtip ha baroh ki District jong ka jylla, haba ia dei bad ki jaka sumar, u myntri rangbah u la ong ba ka dei ka jingshisha ba ki duna, hynrei ka sorkar kan sa leh ia ka ba don kam namar kane ka dei ka kam kyrkieh.
Haba ia dei bad kilad jingiada ia ki nongtrei ka sorkar kala ai hukum ban thied ia ki PPEs 15000 tylli, ki N95 mask la phah thied 15000 bad ki Three Ply mask la phah thied 6 lakh, la phah thied ventilator sa ar tylli, ki Surgrical clove 20 lakh.
U myntri rangbah u la iathuh hapoh ka iing dorbar ba ia ka NEIGHRIMS la ithuh kum kawei na ki jaka test na ka bynta ka North East baroh kawei, hynrei ban pynbna positive test hap ban pynbna da ka National Institute Neurology. La ong ba ka sorkar kala shim bun ki lad ki lynti kumno ban aid a wat la ka jylla Meghalaya kam don pat don ba iong ia kane ka jingpang.
Kiwei kiba la ia shim bynta ha kane ka jingiakren ki long u Dr Mukul Sangma nongialam ka liang pyrshah, Charles Pyngrope, Dr Ampareen Lyngdoh,Meralborn Syiem, Adelbert Nongrum, Dr Azad Zaman.
