Shillong, Jymmang 31: U bah Ardent Miller Basaiawmoit u ba dei President ka seng Voice of the People’s Party (VPP) bad MLA ka Nongkrem Constituency hynne ka sngi Balang, ula rai ban iai bteng ka jingshah thngan tad haduh ba ka sorkar ka pynmih ia ka jingpyntip ba la thaw ia ka Expert Committee ka ban bishar ia ka State Reservation Policy.
Ia kane la pyntip da U Dr. Ricky Syngkon uba long U General Secretary ka seng VPP, hadien ba la wai ka jingialang jong ka Committee on Reservation Roster bad Reservation Policy ba la khlieh da ka Myntri ka tnat Law kong Ampareen Lyngdoh.
U Bah Ardent Miller Basaiawmoit u la pynbna da lade ia kane ka juh ka rai sha ki paidbah hadien ka jingioh ktien ia kaba mih na ka jingialang jong ka Committee ki seng sain pyrthei kaba iatai halor ka Reservation Roster bad Reservation Policy.
Kane ka Committee ka la rai ban phah ia ka jingtyrwa sha ka Sorkar Jylla ba kan thaw da ka Expert Committee, ban shong bishar thymmai ia ka State Reservation Policy.
U Dr. Ricky Syngkon haba kren sha ki lad pathai khubor ula iathuh ba ka Committee ka la mynjur ia ka jingai jingmut ka VPP ban thaw noh da ka Expert Committee ban bishar ia ka Reservation Policy.
“Ngi lah ban ong ba ka jingialang jong ka Committee ka long kaba seisoh namar ka sorkar ka la mynjur ban thaw da ka Expert Committee kumba la dawa ka VPP hynrei u bah Ardent un iai bteng iaka jingshah thngan tad haduh baka sorkar ka pynmih iaka Notifcation ba la thaw ia ka Expert Committee ban bishar ia ka Reservation Policy” la ong U Dr. Ricky Syngkong
Shuh shuh U Dr. Ricky Syngkon u la iathuh ba ha ka jingialang baroh ki sengsain pyrthei kiba don haka Committee kila mynjur da kawei ka sur ban thoh sha ka sorkar ban thaw da ka Expert Committee haka jingdon lang ki stad aiñ bad ki Constitutional Experts ban bishar ia ka Reservation Policy.
U la iathuh ruh ba ha ka jingialang, ka Committee ka la bthah ruh ia ki nongialam sengsain pyrthei ban phah ia ki jingai jingmut hapoh ka 15 tarik Jylliew bad halor ka jingpyntreikam ia ka Roster System bad halor ka Reservation Policy bad hadien kane ka Committee kan sa shong biang ka jingialang ban pyrkhat kumno ban pyntyllun nangne shakhmat.
