Shillong, Nohprah 16: Ka seng Meghalaya SSA Schools Association (MSSASA) ha ka jingialang jong ka seng kaba la long ha Khasi National Dorbar Hall ka la pdiang ia ka rai jong ka sorkar ban pynkiew tulop noh ia ki nonghikai SSA.
Katkum ka hukum ba la pynmih ka long ba kito ki nonghikai SSA kiba la shah pyntbit kyrpang katkum ka Right to Education (RTE) Act bad katkum ki kyndon ka National Council for Teacher’s Education (NCTE) ka sorkar kan pynkiew noh ia ka tulop jong kin a ka T.9200/- sha ka T.19,440/- tyngka ha ki Lower Primary School bad ha ki Upper Primary School pat la pynkiew na ka T.9900/- sha ka T.20493/- tyngka.
Haba kren ha ki nongthoh khubor mynta ka sngi u Bah Aristotle C Rymbai u la ong ba na ka liang jong ka seng kala pdiang ia kane ka rai jong ka sorkar kumba la pynpaw da u Commissioner Secretary jong ka tnad pule ptuhi jong ka jylla u Bah DP Wahlang.
Ha ka juh ka por na ka liang jong u Bah Rymbai u la ong b aka seng ka dawa na ka sorkar ba ka dei ban pynkiew ia ka tulop jong ki nonghikai skul SSA kiba khlem pat shah pyntbit kyrpang haki kam hikai b aka dei ban pynkiew noh sha ka T.18000/- tyngka ia kiba hikai ha ki LP School bad T.19000/- ia kiba hikai ha ki UP School, na kaei kaba ka sorkar kala thmu ban pynkiew T. 13, 335/- bad T. 14, 943/-.
La ong ba kumba 90 percent na ki nonghikai SSA ki dei kiba khlem pat pyndep ia ki jinghikai kiba kyrpang ha ki kam hikai. Ka seng kala ong ia ka sorkar ba ka dei ban phah ia ki ban shah hikai kyrpang katkum ki kyndon hikai.
