Shillong, Nailar 19: Ka National People Party (NPP) mynta ka sngi ka 19 tarik u Nailar 2024 ka la ioh ban ban pdiang sa ia ki 3ngut ki MLA ka Congress ki ba kynthup ia u MLA ka Nongstoin u Bah Gabriel Wahlang, u Bah Charles Marngar MLA ka Mawhati bad u Dr. Celestine Lyngdoh MLA ka Umsning.
Ïa kine ki lai ngut la pdiang sngewbha da u National President ka NPP bad Myntri Rangbah ka Jylla Conrad K Sangma ha ka jingïadonlang ki Nongïalam ka Party, ki ba kynthup ia u State President ka NPP u Bah Prestone Tynsong symbud Myntri Rangbah, u Bah Sngiawbhalang Dhar symbud Myntri Rangbah.
La don lang ki MLA ka seng NPP, Ki MDC ka NPP na Khasi Hills Autonomous District Council (KHADC) bad kiwei kiwei pat ki nongkit kam ka Party NPP. Ia kane ka jingpdiangsngewbha la pynlong ha ka Ophis treikam ba Thymmai ka NPP ka ba don ha Biva Road Shillong.
Ia kane ka jingialang pdiang sngewbah ia kine ki MLA la pyniaid da u Prof Donkupar War Secretary, la ioh ia ka jingkrenpdiang na u Bah Hamlet Dohling.
Na ka liang u MLA ka Mawhati U bah Charles Marngar u la ong ba ka jingwan jong u ban pyniasoh sha ka NPP ka dei ruh ka jingai mynsiem jong u Myntri Rangbah barim ka Jylla u Dr DD Lapang na lor ka rai jong ki nongkit kam bad ki nongialam ka Mawhati constituency.
U la ong ruh ba u buh ka jingshaniah ha u Myntri Rangbah ka Jylla u Conrad Sangma na ka bynta ka roi ka par jong ka constituency jong u.
U bah Marngar u la ongruh ba ka jingwan jong u ban pyniasoh sha ka NPP kam dei na ka bynta ka jingmyntoi shimet hynrei ka dei na ka bynta ka jingbha ka constituency bad ka dong ka thain RiBhoi District. U la ong ruh ba haba peit ia ki kam ba bha jong ka NPP na ka liang jong u um lah ban khlem da wan ban pyniasoh sha ka NPP.
U bah Marngar u la ongruh ba Kum ki MLA ki don ka bynta ban shakri ia ki paidbah hynrei la da phai sha ka ieid Jaidbynriew ha to u bah Charles um ieid jaidbynriew? Wat ha ba u don ha poh ka National Party, u la ong ba ym pat don ha ka history ka Mawhati ba u MLA ha Mawhati u ba lah ban leit da lade shaduh sha Karbi Anglong Assam na ka bynta ka bit ka biang ki paidbah ka thain border.
U bah Marngar u la ong ruh ba nangne sha khmat kum u MLA ka NPP u kloi ban ia trei lang na ka bynta ka roi ka par bad kino kino ki rai ki ban sa shim nagnne sha khmat na ka bynta ka roi kapar jong ka constituency.
Na ka liang u MLA ka Nongstoin u bah Gabriel Wahlang u la ong ba kum U MLA ka Nongstoin Constituency um kwah ba ka constituency jong u kan long ka basah dien wat la u sah kynthoh.
U bah Gabriel u la ong ruh ba ka jingwan ban pyniasoh jong u sha ka NPP ka la wan urlong da ka jingleit lang jong baroh 3 ngut ki MLA. U la ong ruh ba ka jingwan ban pyniasoh jong u sha ka NPP ka long ban pynkhlain ia ka party bad kumjuh ruh ban wanrah ia ka roi ka par ha ka poh ka constituency bad ia ka District West Khasi Hills District.
U bah Gabriel u la ong ruh ba ka jingwan ban pyniasoh jong u ha ryngkat ki nongbut bad nongkyrshan jong u, u kyrmen skhem ba ha ka election ka ban wan ha u snem 2028 ka NPP kan ioh ia ka jingjop ba pura na poh ka Nongstoin Constituency.
Kat ba na ka liang u Dr Celestine Lyngdoh MLA ka Umsning u la pynpaw ba u la jied ban sngapjar ha kine ki khyndiat sngi ba ladep hadien ka jingshah beh seng jong ki ar ngut ki paralok jong u kata u MLA ka Mawhati bad u MLA ka Nongstoin ha ka MPCC ha ka taiew bala dep.
U la ong ruh ba ka jing wan ban pyniasoh jong ki ka long ba ki bun ki surok hynrei ki hap ban shim ia ka ba bha tam. U la ong ruh ba u da angnud ba ka Umsning Constituency kan long ka baroi ba par kum ka jingwan jong ki ban pyn iasoh sha ka NPP ka ba mynta ka la poi sha ka 31 ngut ka jingbunpaid ha ka jingdon ki MLA.
U Dr Lyngdoh u la ong ruh ba kumba iohi mynta ha kane ka jingialang kham bun na ki ki dei ba paralok ba rim ki ba la juh ia trei kam lang ha poh ka Congress hynrei mynta ki la don bad ka NPP kane baroh ka dei ka jingiaid lynti hynrei kam dei shuh ka ba thymai.
